Меню
16+

Сетевое издание «Будни района»

20.11.2020 09:28 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

«100 школа» проект яшавгъа чыгъарыла

Белгили кюйде, «100 школа» деген проект бизин республикабызда яшавгъа чыгъарылагъаны 3 йыл бола. Проектни яшавгъа чыгъармагъа ДР-ни экономика ва территориал оьсювюне къарайгъан министерлигине тапшурулгъан. Олай да, шо проектни яшавгъа чыгъарывда республикабызны билим берив ва илму, къурулуш ва ЖКХ, финанс ишлеге къарайгъан, олай да байлавлукъ ва информатизация министерликлер де къуршалгъан.

Яшавгъа чыгъарылагъан проектни аслу мурады – билим берив ожакъланы материал-техника базасын яхшылашдырмакъ ва олай да, бузукъ биналарда ишлейген школаланы санавун кемитмек.

Шоллукъда, «100 школа» деген проект бизин районда да яшавгъа чыгъарылып тура. Ачыкълашдырып айтсакъ, бизин районда шо проектге гёре 8 орта школа онгартылгъан ва шолагъа мукъаятлы кюйде ремонт этилген.

Тийишли даражада ­янгыртылгъан ва ремонт этилген школаланы муаллимлеге ва охувчулагъа пайдаландырывгъа бермек муратда бугюнлерде шо охув ожакъларда байрам чаралар оьтгериле.

Демек, ноябр айны 18-нде шолай шатлы чаралар Паравул ва Къакъашура 1 номерли орта школаларда оьтгерилди. Шо шатлы байрамларда районну башчысы Магьмут Амиралиев, районну билим берив управлениесини ёлбашчысы Тажли Хизриева, эсгерилген юртланы гьакимбашлары, школаланы муаллимлери, охувчулары ва ата-аналар оьзлени ортакъчылыгъын болдурдулар.

Шо чараларда районну башчысы М.Амиралиев муаллимлер ва охувчулар булан лакъыр этген. Масала, Паравул 1 номерли орта школаны муаллимлери иссилик береген система ­янгыртылгъан сонг, школаны ичинде билим бермеге ва ишлемеге енгил болгъанлыгъын айтгъан.

Паравул юртну башчысы И.Изиев эсгерген кюйде, школаны терезелери алышдырылгъан, пищеблок янгыртылгъан, айландырып чыр къурулгъан, спорт майданча онгарылгъан. Ол паравуллуланы атындан районну башчысына баракалласын билдирген.

Къакъашура 1 номерли орта школаны ёлбашчысы Р.Нурутдинова школаны класларында, коридорларында ва оьзге биналарында арив кюйде ремонт этилгенин эсгерген. Демек, ашхана янгыртылгъан, иссилик система учун янгы котёл алынгъан. Олай да, эсгерилген школаны майданчасына ва пищеблокгъа ремонт этилмеге гёз алгъа тутула.

Ноябр айны 19-нда районну башчысы Магьмут Амиралиев, районну билим берив управлениесини ёлбашчысы Тажли Хизриева ва оьзге жаваплы ёлдашлар Жанга, Ленингент ва Сираги орта школаларда да сапарда болдулар. Шо сапарында олар эсгерилген билим берив ожакъланы, «100 школа» деген проектге гёре, этилген ремонт ишлерине тергев этген ва шонда оьтгерилген шатлы чараларда оьзлени ортакъчылыгъын болдургъан. Районну гьакимбашы Магьмут Амиралиев «100 школа» деген проект гелеген йылларда да узатылажагъын ва районну ичиндеги оьзге школаларда шолай ремонтлар ва янгыртывлар этилмеге гёз алгъа тутулгъанын ачыкълашдыргъан.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

5