Меню
16+

Сетевое издание «Будни района»

30.10.2020 09:33 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Бирликге етер зат ёкъ

Автор: Нюрсагьадат Изамутдинова

Ватаныбызны тарихинде уллу агьамияты булангъы байрамлар кёп бар. Шоланы бириси – Халкъны бирлигини гюню. Шо байрам 2005 -нчи йылны ноябр айыны 4-нден берли белгилене деп гьисап этилсе де, тезден берли белгиленип юрюле болгъан. Артдагъы йыллар шо адат токъталып, 2005-нчи йыл янгыдан белгиленме башлангъан. Тарихден белгили болгъаны йимик, 1612-нчи йыл ноябр айыны 4-нде Мининни ва Пожарскийни асгерлери гьужум булан Китай шагьарны алгъан ва Москвадан польшалы елевчюлени къувалагъан. Шо гюн питне девюрге ахыр салынгъан.

Питне девюр деп 1584-нчю йыл Иван Грозный оьлгенден сонг 1613-нчю йыл Романовланы династиясы пача тахгъа минген гюнге ерли санала. Шо къалмагъаллы заманлар Москвагъа елевчю польшалы черивлер де гирген. Халкъ жыйылып оланы кёп керенлер тозма къарагъан. Тек дворянланы ва къазакъланы арасындагъы эришивлюклени натижасында тахшагьарны елевчюлерден азат этмеге бажарылмай болгъан.

Белгили кюйде, шведлер ва полякляр Москвада ва Новгородда есирлик этип айланагъанда, Рус пачалыкъны гьакимиятлыгъы ва асгерлери ёкъ заманда, Нижний Новгородгъа ана топурагъын якъламакъ учун орус халкъгъа Чакъырыв кагъыз геле. Шо заманда халкъны алдында къатты ва ялынлы сёзлер булан ана топурагъын елевчюлерден азат этмеге чакъыра туруп, староста Кузьма Минин сёйлеген. Шоллукъда, новгородлулар Мининни оьзлени ёлбашчысы этип белгилей, асгербашчы гьисапда буса, князь Пожарский сайлана.

Ана топурагъын якъламагъа бирлешген халкъ, Мининни таклифине гёре, асгерге савут жыймагъа токъташа. Князь Пожарский де айлана якъдагъы Думаны жыйынгъа чакъыра. Пожарский Москваны къырыйында токътагъан шведлер ва къазакълар булан сёйлешивлер оьтгере. Тарих документлер исбатлайгъан кюйде, 1612-нчи йылны август айында Минин ва Пожарский ёлбашчылыкъ этеген асгер Москвагъа гире. Олар савлай шагьарны елей ва Кремлни къамавгъа ала. Ач болгъан поляклар октябр айда къолгъа гелмеге борч­лу бола. Шоллукъда, Кузьма Минин ва Дмитрий Пожарский игит кюйде Москвагъа гире ва ону елевчюлерден азат эте. Шо тарих агьвалатдан сонг, 1613-нчю йыл февраль айны ахырында Михаил Романов Россияны башында пача болуп белгилене. Россияны пача тахында Романовланы агьлюсю 300 йылны узагъында олтура. Шо агьвалатдан сонг, гертилей де, Россия гьукуматны аякъгъа тургъузувгъа, ону халкъыны бирлешивюне, харлысызлыкъны ва пачалыкъны къурувгъа ёл салына.

Россияны пачасы I Пётр Кузьма Мининге ва Дмитрий Пожарскийге “элни къутгъарывчулары” деп ат къоя.

Шо саялы да, пачалыгъыбызны ёлбашчылары РФ-ни кёп мил­летли, кёп къайгъылар гёрген халкъын, ватандашларын бирлик­ге, дослукъгъа, сонг да, тарихни яхшысына ва яманына гьюрмет этмеге чакъыра. Шолай, 15 йыл алда, 2005-нчи йылны ноябр айыны 4-ю Бирлешивню ва разилешивню Гюню деп белгиленген. 2005 -нчи йылда байрамны биринчилей Нижний Новгород шагьарда белгилеме башлагъан. Шо байрамгъа багъышлап Кузьма Мининге ва князь Дмитрий Пожарскийге эсделик салынгъан.

Бугюн буса бу байрамгъа Халкъны бирлигини гюню деген ат берилген.

Шу янгы байрамны аслу мурады – адилли, харлысыз пачалыкъ къурмакъ, элибизни тарихин оьсдюрмек ва маданиятыбызны сакъламакъ учун, халкъны бирлешивге ва разилешивге чакъырмакъ. Халкъгъа бизин гючюбюз бирликде экенни ­англатмакъ болуп токътай.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2