Меню
16+

Сетевое издание «Будни района»

23.10.2020 10:06 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Генгеш оьтгерилди

Талатгюн, 20-нчы октябрде, видеоконференция къайдада Дагъыстанны Башчысыны заманлыкъгъа борчларын кютеген Сергей Меликовну ёлбашчылыгъы булан республикада янгы коронавирус инфекцияны яйылывун алдын алмакъ ва къорумакъ учун къурулгъан хас штабыны гезикли генгеши оьтгерилген. Генгешни ишинде республиканы гьукуматыны уьюрлери ва муниципал къурулувланы башчылары, олай да Къарабудагъгент районну башчысы Магьмут Амиралиев де оьзюню ортакъчылыгъын болдургъан.

Генгешни ача туруп, республикабызны Башчысыны заманлыкъгъа борчларын кютеген С. Меликов аврувну алдын алмакъ муратда юрюлген иш буссагьат медицина кёмек болдурувгъа уллу сынав этген деген ойну ачыкъ этген.

«Аврувну яйылывунда пачалыкъны оьлчевюнде бизин уьлкебиз 23-нчю сыдрада токътагъан. Шо буса гьал ёрукълашгъанны ва тергевню тюбюнде экенлигин билдире. Болса да, гьал гьали де авур экенни де унутмагъа тюшмей.

Ачыкълашдырып айтсакъ, 17 муниципал къурулувда аврувланы санаву арта, 21-нде – ёрукълашгъан ва 14-нде буса ончакъы мекенли тюгюл»,-деген С. Меликов оьзюню сёзюнде.

Олай да, ол хас оператив штабны буйругъу булан адамлар кёп жыйылагъан ерлерде маскалар гиймеге таклиф этген. Демек, гюз гелгенде, ОРВИ ва оьзге сезонлукъ аврувлар арта ва яйыла. Шоллукъда, коронавирус аврув артмагъа шартлар тувулуна.

ДР-ни Оьр Судуну ва прокуратурасыны сёйлешивлерине ва таклифлерине гёре, маска гиймейген адамланы ва шо режимни бузагъанланы жавапгъа тартмагъа имканлыкъ яратылмагъа бола. Айрокъда, гюз-къыш вакътиде эпидемиология гьал бузукълашмагъа бола. Шону алдын алмакъ учун шолай чаралар гючге гийирилмеге гёз алгъа тутулгъан.

Шоллукъда, адамлар коронавирус аврувну алдын алмакъ ва яйылывун токътатмакъ учун маскалар ва къолгъаплар гиймеге, дезинфекция алатлар къолламагъа герек.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4