Экмек – бары затны башы
Дюньяда инг де тарыкълы, болмаса болмайгъан, осуз бизин бир гюнюбюз де оьтмейген ашамлыкъ – экмек. Не аш болса да, экмексиз тепси – тепси тюгюл деп айтма ярай. «Экмек – бары затны башы» деп тюз айтыла. 2006-нчы йыл экмек ва ундан татлиликлер биширивчюлени Халкъара союзуну сиптечилиги булан октябр айны 16-нда Экмекни байрамы белгиленме башлангъан.
Шолайлыкъда, экмекни Бютюндюнья гюню – шо тармакъда ишлейгенлени касбу байрамы деп де гьисаплана. Шо гюн ашлыкъ болдурувчулагъа, экмек биширивчюлеге, демек, экмек бизге етишгинче шо ишге къуршалагъанланы барысыны да байрам гюню белгилене, оланы къайратлы загьматына алгъыш этилине, къаркъарасына савлукъ ва къолларына гюч тилене. Охувчулагъа экмек болдурувчуланы къыйын загьматын англатмакъ, экмекге, ашлыкъгъа, ашлыкъ оьсдюрювчюлеге гьюрмет этмеге уьйретмек муратда, бары да школаларда олар булан эсгерилген темагъа гёре дарслар ва тюрлю чаралар оьтгериле.
Шолай, октябр айны 16-нда Гьасан Абдуллаевни аты къоюлгъан Къарабудагъгент 1 номерли орта школаны 6-нчы класыны охувчулары оьзлени клас ёлбашчысы Р.Гьажиева ва вожатый К.Сайитова булан Къарабудагъгент юртдагъы «Хлебный двор» деген пекарнягъа экскурсиягъа баргъан. Охувчулар экмек бизин столгъа етишгинче пекарняны ичинде оьтгерилеген ишни гёрген. Олай да, олар оьзлер де экмек биширив ишде ортакъчылыкъ этген. Шо ишни къыйынын, нечик загьмат тёгюлегенин гьис этген.
Шулай чаралар яшланы экмекге ва ону этегенлеге абур этме, ону хадирин билме, пуч этмей турма герегин англатар деп умут этебиз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
