Оьз ишине берилген
Октябр айны 5-нде бизин уьлкебизде Муаллимни гюню белгилене.
Муаллимни касбусу бек къыйын касбуланы бириси санала, неге тюгюл муаллимлик ишде инг башлап чыдамлыкъ, рагьмулулукъ, яшлагъа исси гьислер булан янашыв тарыкъ.
Муаллим, айрокъда башлапгъы класланы муаллими- лап да къыйын ва жаваплы иш.
Шо авур ишни жавапчылыгъы ёкъ адам юрютюп болмайгъаны барыбызгъа да ачыкъ. Муаллимни ватандашлар учун пайдалыгъыны арты-алды ёкъ.
Мен шу макъаламда шолай кёп йылланы узагъында яшлагъа билим берип турагъан муаллимни гьакъында язмагъа сюемен.
Написат Гьажиевна Даниялова Къарабудагъгент юртда 1965-нчи йылны март айыны 15-нде тувгъан.
Школаны охуп битдирген сонг, ол Гудермес шагьардагъы педагогика училишеге охумагъа тюше.
1988-нчи йылда охувун тамамлагъаг сонг, оьзю кёп сююп танглагъан муаллимлик касбуну юрютмеге башлай.
Муна, 20 йылны узагъында Н.Гьажиевна юртну гиччипавларына билим ва тарбия бере.
Написат Даниялова къолуна къалам тутуп билмейген кёп гиччипавланы охумагъа ва язмагъа уьйретген, оланы тарбиялавда гечесин-гюнюн бир этип чалышгъан.
Написат Гьажиевна 2010-нчу йылдан башлап, Къарабудагъгент 5 номерли орта школада загьмат тёге. Ону дарслары маъналы ва оьр даражада оьте.
Ишлеген 10 йылны узагъында Н.Гьажиевна иш ёлдашларыны арасында оьзюню яхшы профессионал ва бажарывлу касбучу гьисапда танытгъан.
Биринчи класгъа гелген яшлар оьзлени муаллимин бек сюе ва абурлай.
Оьзю оьтгереген дарсланы Написат Гьажиевна гиччипавлар ялкъмасдай , оюн къайдада оьтгермге гьаракат эте. Н.Гьажиева охувчу яшлар толу кюйде билимлер алсын учун бары шартланы ярата.Оланы оьзбашына ишлеп болардай гьазирлей. .
Охувчуланы билимлени дюньясына талпындырагъан Написат Гьажиевнаны иш коллективини арасында де бек абуру бар.
Ол – яшланы сююмлю ва сюйкюмлю муаллими.
Биз Написат Гьажиевнагъа гиччи яшланы билим берив ва тарбиялав ишинде уьстюнлюклер ёрай туруп, савлукъ, насип, берекет ва узакъ оьмюр ёрайбыз.
Биз ону Муаллимлени гюню булан къутлабыз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
