Касбусуна берилген
Яшланы сюеген ва оланы тилинде сёйлемеге бажарагъан адам болмаса, муаллимлик касбуну юрютмеге къыйын боладыр деп эсиме геле. Шо саялы да, муаллимлер оьзлени оьмюрюн яшланы дюньясында, оланы уьстюнлюклери ва оьрлюклери булан сююне туруп оьтгере.
Валиева Жарият Камиловна оьзюню загьмат чалышывун яшлагъа билим берив булан байлагъан деп айтмагъа ярай. Ол 1978-нчи йылда районубузну гиччи юртларындан бириси Аданакъда тувгъан, ондагъы орта мактапны битдирген. 1997-2002-нчи йылларда Жарият Валиева Дагъыстан пачалыкъ педагогика университетни башлапгъы класларыны муаллимлерин гьазирлейген факультетинде оьр билим алгъан.
2003-нчю йылдан берли ол оьзюню загьмат ёлун ата юртундагъы анадаш мактабында башлапгъы класланы муаллими гьисапда башлагъан. 2015-нчи йылдан бугюнге ерли Ж.Валиева мактапны директоруну ИКТ масъалалагъа къарайгъан орунбасарыны къуллугъунда ишлей.
Ж.Валиева оьзюню касбусунда яшланы юрегине ёл тапмагъа бажаргъан, оланы бажарывлулугъун ва пагьмусун аян эте, мактапгъа янгы абат алгъан охувчулагъа билим алмагъа гьасиретлигин гюн сайын артдыра.
Ону иш ёлдашлары эсгереген кюйде, Ж.Валиева дарсны юрютегенде яшлар бары да тергевюн муаллимге бакъдыра, ону исси иржайыву охувчуланы къыйын мисаллардан ва тапшурувлардан енгил кюйде оьтмеге кёмек эте.
Мактапны ёлбашчысы Уллубий Хидриевни сёзлерине гёре, Жарият Валиеваны дарслары ва клас сагьатлары бир уллу байрам чарагъа айланып къала. Демек, ол адилли кюйде дарсны юрюте, охувчулагъа коллектив ва дослукъ гьислени сингдире.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
