Аты къоюлгъан

А.Абдуллагьатов 1920-нчы йылда Къарабудагъгент юртда оьзден Зиявутдин Абдуллагьатовну агьлюсюнде тувгъан. 1937-нчи йыл Къакъашура юртда 7 класны охуп битдирген. Гиччиден тутуп билим алма амракъ А.Абдуллагьатов доктор касбугъа ес болма ойлаша болгъан. Ол шо йыл Магьачкъала шагьардагъы медицина техникумгъа охума тюше. Орта хас ожакъда Арсан Абдуллагьатов яхшы къыйматлар алып охуй. Тек огъар орта охув ожакъны битдирме насип болмай. 1940-нчы йыл техникумну 3-нчю курсундан ону асгер борчун кютме армиягъа чакъыра. Ол 3-нчю Беларус фронтну полкуну байлавлукъ ротасында къуллукъ эте. Асгер къуллукъ къавгъасыз, къалмагъалсыз бара. Шо парахатлыкъ узакъгъа узатылмай. 1941-нчи йылны яйында тишлерине ерли савутлангъан фашист Германияны елевчю асгерлери намарт кюйде чапгъын этген деген аччы хабарны эшите.

3-нчю Беларус фронтну асгер полкларыны сыдраларында душмангъа къаршы ябушувларда ортакъчылыкъ эте. Ротада ол аркъасында башлап тюбек, сонг автомат булан штабны командирлерине байлавлукъ болдурув ишни кюте.

Давну башлапгъы гюнлери, айлары совет асгерлер учун нечакъы да авур болгъан. Хапарсыздан чапгъын этген душман уьлкебизни гюнбатыш бойларын, шагьарланы, юртланы дагъылта, елей юрюй. Совет воинлер нечакъы авур агьвалатлагъа тюшсе де, бюдюремеген, тенгсиз ябушувларда къоччакълыкъ, игитлик гёрсетип ябушгъанлар.

Арсан Абдуллагьатов дав ёллар булан Кенигсбергни елеп, Уьстюнлюкню къаршылай.

1945-нчи йыл Къызыл Армияны асгерлери душмандан уьст болса да, бизин макъалабызны игити учун дав битмеген. 1945-нчи йыл ол къуллукъ этеген полкну самолётлар булан Йыракъ Гюнчыгъышгъа тюшюре. Шо заман бизин пачалыкъгъа Япония чапгъын этме гьазир болгъан. Совет асгерлер 1945-нчи йылны сентябр айында Японияны асгерлерин тоза, дагъылта.

1945-нчи йыл дав битсе де, кёп солдатлар алышдырма эргиши гюч етмейгени саялы, армияны сыдраларында къуллукъ этивюн узатгъанлар А.Абдуллагьатов да 1948-нчи йыл болгъунча армияда къуллукъ этип къайтгъан. Армиядан къайтгъан сонг ол гьар тюрлю къуллукъларда ишлеген. Ишлей туруп, 1952-нчи йыл 10 класны битдире.

КПСС-ни район комитетинде бёлюкню ёлбашчысы, инспектор болуп ишлеген. Шондан таба Ростов шагьарда эки йыллыкъ партия школаны битдире.

1965-нчи йыл А. Абдуллагьатовну райПО-ну правлениесини председатели этип сайлайлар. Бу къуллукъда ишлей туруп, А.Абдуллагьатовну къурумчулукъ пагьмусу айрыча аян бола.

Ол 11 йылдан да къолай райПО-ну правлениесини председатели болуп ишлеген йылларда районда къурулгъан тюкенлер, ашханалар, жамият ашамлыкъ идараланы санаву 52-ден де къолай.

А.Абдуллагьатовну бажарывлулугъу, гьаракаты булан шо йылларда ватандашланы къуллукъларын кютеген идаралар къурулгъан. Манасдагъы «Кооператор» ресторан, райцентрдагъы аш биширеген пекарня Арсанны чалышыву, гьай этивю булан амалгъа гелген.

А.Абдуллагьатовну районну жамият ашамлыгъына, сатыв-алыв тармагъына этген къошуму аслам.

А.Абдуллагьатовну тёшюн дав орденлерден къайры, уьлкени гьукуматы берген орденлер, белгилер безей эди.

А.Абдуллагьатовну районну ёлбашчыларыны, районлуланы, юртлуланы арасында да яхшы абуру бар эди. Ол бир нече керенлер район ва юрт Советлеге депутат болуп да сайлангъан. Юртуна, халкъына жаны авуртагъан ёлдаш юртну жамият ишлеринде актив кюйде ортакъчылыгъын болдургъан.

Шолай оьзден уланларыбызны атларын эсде сакълама тарыкъ.

Алдагъы гюнлерде А.Аб­дуллагьатов яшагъан, алдагъы Вишневский орамгъа гьали Арсан Абдуллагьатовну аты къоюлгъан. Бизин уллу наслубузну къайсы да шолай эсделикге лайыкълы болгъан.