Генгеш оьтгерилди

Генгешни ачгъан ва юрютген районну социал-сиясат управлениесини ёлбашчысы Гюлжанат Темирова 2019-нчу йылны натижалары ва етишген уьстюнлюклери булан жыйылгъанланы таныш этди.

Инг башлап, Г.Темирова 2019-нчу йылда яхшы натижалар гёрсетгенлени баракалла кагъызлар булан савгъатлады.

Оьтгерилген генгешни барышында январ айны 16-нда Россия Федерацияны Президенти Владимир Путин Федерал Жыйынгъа оьзюню гезикли Чакъырыв кагъызы булан сёйлегени гьакъда айтды.

Демек, Президентни Чакъырыву социал масъалалагъа ва социал якъдагъы ишлени яхшылашдырмакъ учун бакъдырылгъанны Г.Темирова жыйылгъанлагъа ­ачыкъ этди.

Маданиятны гьакъында айта туруп, Г. Темирова пачалыкъны РФ-ни Президенти В. Путин «Культура» деген хас проектге гёре, бу йыл музыкалы школалагъа гьар тюрлю алатлар алмагъа 8 миллиард акъча маялар гёрсетгенин айтды. Гертисин айтсакъ, шолай школалар бизин районда ёкъ.

Китапханалагъа ва маданият къурумлагъа пачалыкъны янындан бек тергев берилежек.

Олай да, бу йыл бизин пача­лыкъ Уллу Ватан давда уьст гелгенли 75 йыллыкъ юбилейин белгилежек. Биз давда ортакъчылыкъ этип уьстюнлюкню гелтиргенлер булан бек оьктем болабыз. Оланы игит ишлерин даимге эсде сакълажакъбыз.

Сонг да, уьлкеде давгъа багъышлангъан архив документлени сакълайгъан янгы уллу комплекс къурулажакъ.

Оьзюню Чакъырывунда В.Путин жагьил ва кёп яшлары бар агьлюлени яшав даражасын яхшылашдырмакъ муратда бу йылны январ айындан башлап 1-нчи яш тапгъан аналагъа аналыкъ капиталын берегенни ва экинчи яш тапгъанлагъа аналыкъ капиталы 616 минг манатгъа чыгъагъаны гьакъда айтды.

Олай да, уьч яшы бар агьлюлеге ипотека кредитни 450 минг манатын пачалыкъ оьзю тёлежеги эсгерилди. Шо – бизин райондагъы жагьил агьлюлер учун уллу кёмек. Демек, олар ипотека кредитлер алса, пачалыкъ яртысын тёлежек. Шо программа 2026-нчы йыл болгъунча узатылажакъ.

Олай да, Г.Темирова РФ-ни Президенти В.Путин ярлы ва тёбен даражалы яшайгъан агьлюлеге социал тёлев акъчалар 11 минг манатгъа етишежекни билдиргенни эсгерди. Шоланы документлерин адамлар МФЦ-де онгармагъа болажакъ.

Шо гюн оьтгерилген генгешде 2019-нчу йыл этген ишлерини гьакъында Къурбуки юртну ДЮСШ-ни ёлбашчысы Магьамматрасул Абдулкеримов, Къарабудагъгент юрт ДЮСШ-ни тренери Камал Паталиев, Къакъашура юрт ДЮСШ-ни ёлбашчысы Ш.Хыясов, РЦ БОН-ну ёлбашчысы А. Сотаева, Къарабудагъгент юрт ДДТ-ни ёлбашчысы Б. Абакаров чыгъып сёйледилер.

Генгешни ахырында социал сиясат управлениени ёлбашчысы Г.Темирова бары жыйылгъанлагъа янгы йылда дагъы да яхшы ишлемекни ёрады.