Сююмлю муаллим

Гьали мен ишине жаваплы кюйде янашагъан муаллим булан газетни охувчуларын таныш этмеге сюемен. Ол – Къарабудагъгент 3 номерли орта школада орус языв ва адабиятдан дарс береген муаллим Сара Бахриева.

Сара Бахриева 1994-нчю йылда школа-гимназияны оьр къыйматлагъа битдирип, шо йыл Дагъыстан пачалыкъ университетни филология факультетине охумагъа тюше. Эсгерилген оьр охув ожакъда охувун узата туруп, 1996-нчы йылда гимназияда методистни къуллугъун кютеген Валентина Петровнаны алдында кёмекчи болуп иш башлагъан ва 1999-нчу йылда къошум билим берив муаллим болуп чалыша.

Артдагъы 2000-нчи йылдан тутуп С.Бахриева Къарабудагъгент 3 номерли орта школада оьзюн толу кюйде ишге багъышлай. Гьаракатчы ва талаплы муаллим оьзюню биринчи ишге гиришген гюнлеринден тутуп оьтгереген дарсларыны сан янын яхшылашдырмакъны къастын болдурмакъны гьайында тура. Охувчулагъа исси кюйде янашып гёнгюн алма болагъан сююмлю муаллим С.Бахриеваны школаны коллективини ичинде де уллу абуру бар.

Сынавлу муаллим С.Бахриева кёп йылланы узагъында муаллим касбуну юрютюп турса да, гьар дарсына тындырыкълы кюйде гьазирлене. Охувчуланы юреклерине оьзюню сюювюн гийирме бажаргъан С.Бахриева яшлагъа къатты ва терен билимлер бермек учун бар гючюн сала. Дарсларын тынч ва енгил, къужурлу оьтгермек муратда дарсларында тюрлю методика къайдаланы къоллай, билим даражасын гётермек къаст булан гече-гюн чалыша ва олагъа оьз яшлары йимик йымышакъ ва исси янаша.

Сара Бахриева – бажарывлу, оьз ишин оьр даражада билеген муаллим. Асил сёзлю, ярыкъ юзлю Сарада муаллимде болмагъа герекли бары да хасиятлары бар. Олай да, С.Бахриева оьзюню предметин яхшы билегенден ва сюегенден къайры, ону яратывчулукъ пагьмулары да ачылгъан. Ол къумукъча ва орусча маъналы шиърулар яза. Ону шиърулары «Районну яшаву» деген газетде печат этилген. Ол кёп керен администрацияны ва школаны атындан гьюрметлев грамоталар булан савгъатлангъан. Республикада оьтгерилген «Шаг в будущее», «Науки юношей питают» деген конкурсларда ону охувчусу Найрат Магьмудова 1-нчи ерге ес болгъан. «Доброе слово душу разбудит» деген конкурсда республика этапда Б.Мамаев 1-нчи ерни алгъан.

Бютюндюнья хабар тизив конкурсну муниципал этабында Хайранса Сайидова 1-нчи ер ва республика этабында 3-нчю ерге ес болгъан.

2017-нчи йылда республика оьлчевде оьтгерилген «классный класс» деген муаллимлени конкурсуну муниципал этабында С.Бахриева 1-нчи ерни алгъан.

Олай да, 2018-нчи йылда «Лучший иновационный проект» деген конкурсну муниципал этабында – 1-нчи ва республика этабында 3-нчю ерге ес болгъан.

Ол билим берив министерлигини янындан «Почётная грамота» булан савгъатлангъан ва «Билим беривню отличниги» деген атгъа ес болгъан. Гьаракатчы муаллимге гележекде де билимли ва тарбиялы охувчулар ва ишинде уьстюнлюклер ёрайман.