Райцентр безене ва тюрлене

Буссагьатгъы вакътиде Къарабудагъгент юртда «Комфортная городская среда», «Мени Дагъыстаным – мени ёлларым», «Мени Дагъыстаным – таза сувлар» деген программалагъа гёре райцентрда этилген, этилип турагъан ишлени райцентр­ны гьар ватандашы, гелген къонакъ­лар гёрюп туралар. Райцентрда этилип турагъан ишлерден юртлулар, гелген къонакълар къуванмайлы болмай.

Ерлерде, шону ичинде райцентрда юрюлюп турагъан ишлени сан яны, оланы токъташдырылгъан болжалларда ишге берив районну ёлбашчыларыны тергевюню тюбюнде тура.

Муна, декабр айны 2-нде хас комиссия башында районну башчысыны биринчи орунбасары М.Нухов, район Жыйыныны депутатларыны председатели Б.Сахаватов, район Жыйыныны председателини орунбасары К.Мурзаев, районну тамазаларыны Советини председатели А.Мамагишиев, районну баш архитектору А.Гьажиев, районну КС ва УЖКХ-ны ёлбашчысыны орунбасары М.Абусайитов, районну топуракъ-мал-матагь аралыкълагъа къарайгъан бёлюгюню къуллукъчулары, депутат корпусну вакиллери, «Комфортная городская среда» деген программагъа гёре райцентрда этилип турагъан ишлени барышына тергев этип чыкъгъан.

Шо программа булан Къарабудагъ­гентде 9 ерде (объектде) безендирив, гёзеллешдирив ишлер этилип тура. Шоланы 6-сы толу кюйде тамамлангъан.

3 объектде ишлер къызгъын кюйде юрюлюп тура. Олар: «Гь.Гьамзатовну» атындагъы бавда ял алагъан ер (сквер), А.Абакаровну атындагъы орамда адамлар юрюйген ёл ва «Бекенездеги» сквер.

Гь.Гьамзатовну атындагъы бавда ва А.Абусаламовну атындагъы орамда этилеген ишлер тамамланма ювукъ болгъан. Бу ишлени кютеген къурумну вакиллерини сёзлерине гёре, эки де объектде ишлер бу жуманы ичинде тамамланажакъ.

«Бекенез» скверде этилме герек­ли ишлени 30 проценти яшавгъа чыкъ­гъан.