Дагъы да оьрлюклер ёрайбыз!
Декабр айны 3-нде Россия Федерацияны Генеральный прокуратурасында Юристни гюнюне багъышлангъан байрам оьтгерилген. Чарада Россияны бары да юрист Бирлешивлерини вакиллери ортакъчылыкъ этген.
Байрам чараны барышында РФ-ни Генеральный прокуроруну орунбасары Леонид Коржинек Генеральный прокуратураны центральный аппаратурасыны яхшы иш гёрсетген къуллукъчуларына ведомстволукъ савгъатлар тапшурду. Шоланы арасында «За верность закону» деген уьчюнчю даражалы белги булан бизин юртлубуз, юстицияны 2-нчи класлы пачалыкъ ойчусу, юрист илмуланы доктору, профессор, ДР-ни ва РФ-ни ат къазангъан юристи Шапиева Ольга Гьасановна да болгъан.
Ольга Гьасановна Шапиева 1957-нчи йыл ДАССР-ни Ленин районуну Къарабудагъгент юртунда тувгъан. 1974-нчю йыл ол Къарабудагъгент 1 номерли орта школаны алтын медальгъа битдирген, 1979-нчу йыл ДГУ-ну юрист факультетин инг яхшы къыйматлар булан тамамлагъан.
1985-нчи йыл Ленинград пачалыкъ университетде кандидат диссертацияны якълагъан ва ДГУ-ну юрист факультетинде «Теория и история государства и права» факультетинде дарсберивчю болуп иш башлагъан.
Сонг Ольга Гьасановна Шапиева ДР-ни Конституция Судунда Судья болуп, ДР-ни Юстициясыны министри, ДР-ни Федерал регистрация къуллугъуну управлениесини ёлбашчысы, РФ-ни Генеральный прокуратурасыны Федерал закон чыгъарывчулукъ ишни кютювюне тергев этеген Баш управлениени старший прокурору болуп ишлеген.
Гьали Ольга Гьасановна РФ-ни Генеральный прокуратурасыны федерал закон чыгъарывчулукъ ишни кютювге тергев этеген Баш управлениесинде ватандашланы ихтиярларын ва эркинлигин болдурувгъа тергевюн болдурагъан Управлениени ёлбашчысыны орунбасары болуп ишлей.
Ольга Гьасановнаны шо оьр савгъаты булан къутлай туруп, огъар къатты савлукъ, касбусунда дагъы да уллу оьрлюклеге етишмекни ёрайбыз!
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
