Рагьатланма гьали де тез

Регионну Башчысыны сёйлевлеринден ачыкъ болгъаны йимик, умуми алгъанда коронавирус инфекция аврувну алдын алывда, авруйгъанланы сав этивде гёрюлген чаралар, къабул этилген къарарлар заманында этилгенин исбатлай. Шо бир вакътини ичинде коронавирус инфекция аврув булан ябушув юрютювде рагьатланма бизге гьали де тез. Касбучулар айтагъан кюйде коронавирус инфекция аврувну алтынчы толкъуну болма бола.

- Къарагъыз, Китайда коронавирус инфекция аврув булангъы гьал нечикдир, авруйгъанланы санаву бир токътамай артып тура. Нечесе шагьарлар, провинциялар узакъ болжаллы карантинде. Дюньяда коронавирус инфекция аврув булангъы гьалны тергевге алып, гетген йыллар аврувну алдын алывда йиберилгенин кемчиликлер такрарланмасны гьайын этме тарыкъ,- деген республиканы Башчысы.

Шо саялы, ватандашлагъа планлы медицина къуллукъланы кютювню планын яшавгъа чыгъара туруп, койка фондну даим гьазир сакълама герек. Шо, айрокъда етишип гелеген сыйлы ораза ва язбашны, загьматны байрамларыны алдында айрыча агьамиятлы. Шо бир вакътини ичинде коронавирус инфекция аврув булан ябушув юрютювде ерлерде профилактика чараланы сакълавда, вакцина этдиривде агьамиятлы кюйде къала, — деген Сергей Меликов.

Умуми алгъанда, республикада 1337 656 адам инфекциягъа къаршы вакцина этдирген, шо вакцина этдирме тарыкълыланы 74,3 проценти бола.

Дагъыстанны вице-премьери Мурад Къазиев билдиреген кюйде, бугюнге республикада 116 минг доза вакцинаны запасы бар. Регионда коллектив иммунитетни болдурмакъ учун эсли халкъ вакцина этдирме болагъан 89 пункт, 59 мобильный пунктлар ва 187 мобильный бригадалар ишин узаталар. Ватандашланы арасында вакцина этдиривге байлавлу англатыв-ярыкъ­ландырыв ишлер давам этиле. Ондан къайры да вакцина этдирме сюегенлеге пачалыкъ къуллукъларын кютеген порталдан таба язылма имканлыкъ­лар яратылгъан.

Роспотребнадзорну ва ДР-ни савлукъ сакълав министерликлени ёлбашчылары Николай Павлов ва Татьяна Беляева ёлдашлар коронавирус инфекция ва оьзге тюрлю югъагъан аврувланы алдын алывда оьзлени пикирлерин айтгъан. Ерлерде аврув булангъы гьалны суратлагъанлар.

Роспотребнадзорну далилерине гёре бугюнге республикада, лаборатория токъташдырагъан кюйде, 92550 адам янгы коронавирус инфекция аврув булан авругъан. Суткада 17 аврув токъташдырыл­гъан гезик болгъан.

«Бизде коронавирус инфекция булангъы гьал бугюнге къоркъунчлу тюгюл. Тек, гёрюп турабыз, бу яман аврув къаравулламагъан заманда «тешип» чыкъма бола. Шо саялы ватандашланы коллектив иммунитетин болдурма тарыкъ», — деген Дагъыстанны Башчысы.