Оьзюбюзню де гьаракатыбыз болма тарыкъ

Багьаланы гётериливю яхшы тюгюл. Айрокъда, адамлар гьар гюн къоллайгъан сурсат продукталаны гётериливю кёп яшлы агьлюлени, аз алапа алып ишлейген адамланы, пенсионерлени яшав даражасына таъсир этмей къоймажагъы гьакъ.

Уьлкени башчылары кёп яшлы агьлюлени, пенсионерлени, оьзге тармакъланы къулулкъчуларын, увакъ, орта далапчылыкъ булан машгъул къурумларда якълавсуз къалмажакъ деп билдирелер.

Ондан къайры да, уьлкени башын тутгъанлар Россияда сурсатны къытлыгъы ёкъ, сатыв-алыв точкаларда, оьзге идараларда багьаланы гётериливю заманлыкъ иш, логистика аралыкълар ёрукълашса, бары да зат ерине гележек деп рагьатландыралар.

Адамлар гьали бир тамаша болгъан. Топуракъда доланма сюймейлер, тарыкъ затны базаргъа барып, сатып алып къойма сюелер.

Бары халкъ тюкенлерден, базарлардан сатып алма сюе буса, ашамлыкъны ким болдурма тарыкъ. Продукта аз болгъан чакъы къытлыкъ гьис этиле ва багьалар гётерилегени гьакъ.

Юрт ерде яшагъан сонг, гьар адам гьар затны оьлчеп, агьлю бюджетге кёмек болагъан кюйню чарасын гёрме тюше.

Айтма тарыкъ, уьлкеде болгъан демократия алмашынывлардан бу якъгъа адамлар ашамлыкъгъа кёп харж этеген болгъан. Къайсыбызны да столларыбызны уьстю гьар-тюрлю ашамлыкъдан моюлуп геле. Озокъда, уьй хозяйка аш учун гьар гюн къоллайгъан сурсатны базарлардан сатып аламан деп ойлаша бусакъ багьаланы гётериливюне де кант этме тюшмей.

Мен бу масъаланы гётерегеним, биринчи керен тюгюл. Адам юрт ерде яшагъан сонг, яшылчанланы, самурсакъны, согъанны, картюшкени ва булардан къайры оьзге тюрлю юрт хозяйство продукталаны абзар ягъа участкаларыбыз да болдурма къаст салсакъ агьлю бюджетни чыгъышларына эконом болур эди. Ондан къайры да, чачывлагъа къуллукъ этивде топлангъан бай сынав, яшыртгъын сырлары тас болмас. Оьсюп гелеген яш наслу абзар-ягъа участкада топуракъ булан доланагъан ата-ананы гёрюп олардан уьлгю алма къарар, загьматда чыныгъар.

Къарагъанда, бизин сюймейген, Россиягъа къаршы экономика дав билдирген тыш пачалыкъланы гьакимбашлары бизин уьлкеге къаршы билдирилген гючлю санкциялар дазу тюгюлге ошай.

Бизин уьлкени башын тутгъанлар айтагъан кюйде, санкциялар бизин экономикабызгъа бир де къоркъунчлукъ бермей, уьстевюнде аякъгъа турувуна, оьзге тармакъланы оьсювюне болушлукъэте.

Гертилей де, гьал шолай. Къарагъыз, артдагъы йылларда уьлкебизни юрт хозяйство тармакъда етишген оьрлюклер. Биз ашлыкъ булан уьлкени, ич талапларын толу кюйде кютегенден къайры, тыш пачалыкълагъа да сатабыз.

Уьлкеде, республикада, районда сурсат продукталаны къытлыгъы болмасын, багьалар гётерилмесин учун оьзюбюз де къошум этме тарыкъбыз. Районда абзар-ягъа участкасы, топуракъ пайы ёкъ ожакъ ёкъдур. Топуракъда доланма, агьлюге тарыкъ болагъан сурсат продукталаны болдурма гьаракат этме тарыкъ. Агьлюде къышда сакълама болагъан согъанны, самурсакъны, къабакъны, бурчакъны ва оьзге продукталаны запасын болдурсагъыз, чыгъышларыгъыз хыйлы аз болур, артыгъын сатма бола

Юрт хозяйство производствода доланма сюегенлени санавун артдырма, топуракъларыбыз толу кюйде ишлетилгенни сюе бусакъ уьлкени башын тутгъанлагъа ягъарлыкъ-майлав материалланы, агъулу дарманланы, минерал кюйлевючлени багьаларын ёрукълашдырма чаралар гёрюлмесе, пайда болмас.