Эрте язбашгъы авлакъ ишлер
Районну юрт хозяйство управлениесини касбучулары авлакъ ишлеге гьазирлик гёрювню, ишлени барышын оьзлени тергевюню тюбюнде сакълай, олагъа оьзлени къолундан гелеген кёмеклени этме гьаракат этелер.
Муна, алдагъы гюнлерде УСХ-ны баш агроному Магьамматшапи Абдулвагьабов ва ведущий касбучусу Гьажакъай Гьажиев ёлдаш булан Къакъашура ва Къакъамахи юртларда эрте язбашгъы авлакъ ишлеге, язлыкълар чачывгъа гьазирлик гёрювде этилген ишлени гьазирлигин тергеп чыкъгъанлар.
Къакъашурада бу йылны тюшюмю учун 850 гектарда къылчыкълы гюзлюк ашлыкълар, демек будай, 115 гектаргъа гюзлюк арпа чачылгъан.
Юртда язлыкълар чачывгъа да гьазирлик гёрюв ишлер юрюле. Эрте язбашда къакъашуралылар ва къакъамахилилер 162 гектаргъа язлыкъ арпа чачма хыял эте. Топуракъ гьазир, урлукъ бар. Ондан къайры да юртда 70 гектаргъа кёп йыллыкъ от (люцерна), 12 гектаргъа тритикали, 450 гектаргъа бир йыллыкъ отлар, 3 гектаргъа гьабижай, 5 гектаргъа бахча оьсюмлюклер (къабакъ) чачма къаст салынгъан, топуракъ гьазир.
Адамлар топуракъда доланма сюйсе де, техниканы къытлыгъы ишге пуршавлукъ эте. Бу масъала Къакъашура ва Къакъамахи юртларда онча итти де тюгюл. Авлакъларда ишлейген 5 «ДТ-75» шынжырлы, 3 “Т-150” тракторлар ва олагъа тиркелеген алатлар бар.
Язлыкъ авлакъ ишлени къурумлу оьтгермек муратда дёгерчекли тракторлар: «МТЗ-80»-5, «МТЗ-82»–6 бар, тарыкълы оьзге алатлар да етише. Юртда 6 комбайн, 5 прес-подборщик бар.
Буссагьатгъы вакътиде язлыкъ ашлыкъланы, кёп йыллыкъ отланы чачма гиришме заман болгъан. Тек, тавтюп зонада ерлешген юртланы топуракъларында къар тайып битмеген. Шо себепден язлыкълар чачыв артгъа теберилип тура. Къакъашуралылар бек ишлейген, топуракъны хадирин билеген адамлар, онгайлы гюнлер гелгендокъ авлакъ ишлени къурумлу оьтгерме, бел бюгюп гиришежегине шеклик тувдурмай.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.