Ватанын якъламакъ – сыйлы борч

Гьали де оьрде эсгерилген республиканы хыйлы шагьарларын, юртларын Зеленскийни фашист режиминден азат этме, онда яшайгъанлагъа эркинлик, парахат яшав гелтирме тарыкъ.

РФ-ни Савутлу гючлерини баш командующийи Владимир Путинни къарары булан дазулангъан хас дав чарада янгыз дыгъар булан къуллукъ этеген, мобилизация ва гёнгюллю кюйде баргъанлар дав эте.

Савлай Европаны пачалыкълары башында США, Англия, Франция ва оьзгелери Украина булангъы къалмагъалда Россия тюп болсун учун токътавсуз савут, харж булан кёмек эте.

Бизин пачалыкъгъа къаршы дав юрютеген пачалыкъланы хыялларына къаршы турма тарыкъбыз. Хас дав чарада ортакъчылыкъ этегенлеге болагъан кёмеклерибизни де этме тарыкъбыз.

Армияда дыгъар къайдада къуллукъ этмек – гёнгюлю иш. Амма артдагъы вакътиде дыгъар къайдада къуллукъ этегенлерине гьукуматны янындан кёп енгилликлер болдурулгъан. Айтагъаныкъ, гьар ай берилеген 204 минг манатдан къайры, оьзге енгилликлер де бар. Демек, олайланы авлетлери яшлар бавларына, орта, оьр охув ожакълагъа охума тюшме бола.

Уьлкебизни оьзге регионларында, Дагъыстанда, шону ичинде бизин районда да армиягъа баргъанланы арасында дыгъар къайдада къуллукъ этме сюегенлени арасында англатыв ишлер юрюле.

Июн айны 7-нде районну башчысы Магьмут Амиралиев, ону орунбасары Элдар Давутов, районну дав комиссары Дайитбек Шагьбанов, ону орунбасары Абдулгьамит Алимурзаев, Аданакъ юртну башчысы Къазбек Мугьажиров ёлдашлар юртлулар булан ёлукъгъан ва Россияны савутлу гючлерини сыдраларында дыгъар къайдада къуллукъ этивню шартларын, гёрсетилеген енгилликлени англатгъан.

Районну дав комиссары Дайитбек Шагьбанов Россияны Савутлу гючлерини сыдраларында дыгъар къайдада къуллукъ этегенлеге не йимик онгайлыкълар барын аян этип сёйлеген. Украина булангъы хас дав чара контролну тюбюнде, войскаларда не савут, не сурсат якъдан проблема ёгъун аян этип сёйледи.

Районну ополчениясыны командири, Росгвардияны полковниги Арсен Ягьияев оьзю Аданакъдан. Ол оьзюню сёйлевюнде бизин районну халкъы россияны оьзге миллетлерини вакиллери йимик ватанын, ана топурагъын гьар заман якълап гелген ва гьали де якълажакъ деди.

Ёлугъувну ахырында районну башчысы Магьмут Амиралиев бизин яшлар дав майданларда къоччакълыкъ, игитлик гёрсетип ябушагъанын эсгерди. Ондан къайры да, администрация дазулангъан хас дав чарада ортакъчылыкъ этегенлени, оланы агьлюлерин, авлетлерин якълайгъанын, энниден сонг да якълажагъын эсгерди.