Тапшурувларын кютеген коллектив
Районну ичинде иш гёреген «ДЭП-17»-ны коллективи юртланы орамларына асфальт салывда, онгарывда, ёл юрюшлени низамын токъташдырагъан белгилер салывда, федерал, республика агьамияты булангъы ёлланы айлана ягъын къоруп сакълавда, ёлланы яхшы гьалда сакълавда гьар йыл кёп ишлер этегенни гёрюп турабыз.
Ёл юрюш управлениени коллективи районну ичиндеги социал объектлени, школаланы абзарларын, юртланы ичиндеги жума межитлерини айланасын безендиривде, асфальт салывда да кёп ишлер этегени гьакъ.
Юртланы башчылары, къурумланы ёлбашчылары, оьзге рядовой ватандашлар къурумну башчысы Вагьапгьажи Алиевни ва савлай коллективни атына этген иши саялы разилигин билдире, лайыкълы сёзлер айталар.
2023-нчю йылны биринчи яртысы бите тура. Бу йылны оьтген беш айындан да къолай заманны ичинде районда не йимик ишлер юрюлюп турагъанны билмек учун олгюнлерде биз къурумну ёлбашчысы В. Алиев булан ёлугъуп, коллективни бу йылгъы планлары гьакъда сёз юрюлдю. Биз берген соравлагъа жавап къайтара туруп Вагьапгьажи Алиев булай деди:
– Бизин коллективни алдына салынгъан аслу борч – бизин къурумгъа белгиленген федерал, республика агьамияты булангъы ёлланы гьалын, ёл бойдагъы нас, чёп отлардан тазалав. Биз 246 километр мезгилдеги сылама ёлну къуллукъларын кютебиз. Ондан къайры да, районный ёл фонддан таба районну юртларыны орамларына, социал объектлени майданчаларына, районну ичиндеги оьзге къурумланы абзарларына асфальт салына. Бизин коллектив бу йыл 50 миллион манатны къадарына иш этме гёз алгъа тутулгъан. Олгюнлерде райцентрда Абдуллаевни атындагъы орамны бир гесегине Пионер орамгъа асфальт салынды. Ондан къайры да, бизин коллектив ёлланы тетиклерине асфальт салып, онгарып юрюй. Бугюн шолай ишлер Давут Къарабудагъгентлини атындагъы орамда юрюлюп тура. Ондан къайры да, бизин ишчилерибиз ветлечебницаны абзарына асфальт салды.
Къурбукиден Леваши районгъа барагъан ёлну эки де бою онгарыла, ёлну 16 километр мезгилинде юрюшню белгилерин салыв ишлер юрюле.
Бизин коллективде оьз ишини усталары, загьматда чыныкъгъан ёлдашлар загьмат тёге. Бу йыл да бизин коллективни уьюрлери ёлланы къоруп сакълавда, ёл бойларда тазалыкъны болдурувда, юртланы орамларына, социал объектлеге асфальт салывда оьзлени алдына салынгъан борчланы уьстюнлю кюйде яшавгъа чыгъаражагъына теренден инанаман.
Бизге де коллективге ишинде уьстюнлюклер ёрамакъ къала.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
