Гьели юртда ёлугъув

Къарабудагъгент районну гьакимбашыны орунбасары Элдар Даудов, районну дав комиссары Дайитбек Шагьбанов, военкомну орунбасары Абдулгьамит Алимирзаев ва район администрацияны оьзге вакиллери ёлугъувну вакътисинде ватандашлагъа асгер къуллукъгъа дыгъар булан байланывну критерийлери, къуллукъгъа кандидатлардан талаплар ва олагъа гьукуматдан гёрсетилген гьар айлыкъ акъча маялар, енгиллик­лер гьакъда англатывлар бердилер.

Ёлугъувну барышында военкомну сёйлевюнден ачыкъ болгъаны йимик, хас дав чараны ал сыдраларыны гьалы къатты контрольну тюбюнде ва шонда буссагьатгъы заманда чечилмейген масъалар ёкъ.

Сонг да, район администрацияны башчысыны орунбасары Элдар Даудов оьзюню сёйлевюнде бизин райондан 200 ватандаш асгер къуллукъгъа дыгъар байлагъанын айтды. Олай да, сёзюн тамамлай туруп ол район администрацияда хас дав чараны ортакъчыларына топуракъ гесеклер бермекни масъаласы да арагъа салынып ойлашылагъанны да эсгерди.

Эсгерилген ёлугъувну ахырында Гьели юрт администрацияны башчысыны орунбасары Абдулла Алибеков оьзюню ва юртну активини атындан район администрацияны ва военкоматны вакиллерине заман табып гелме болгъаны ва гётерилген масъалагъа гёре ватандашланы алдында юрютген англатыв иши саялы баракалла билдирди.