Асувлулугъу гётериле

“Буссагьатгъы девюрде бизин ишибизден, гьаракатыбыздан кёп зат гьасил бола. Демек, биз загьматчы халкъгъа лап ювукъ гьакимлик къурумбуз. Бизге адамлар оьзлени къыйыны, дерти, сююнчю булан гьар гюн ёлугъа, бизден тувулунгъан масъалаланы тез, тюз чечивню къаравуллай! Биз оланы лайыкълы къаршылама, масъаласына сабур кюйде тынглама, бажарыла буса, дес­тине яшавгъа чыгъарып ёлгъа салма, адамланы разилигин алмакъны гьайын этме тарыкъбыз,”- деп башлады оьзюню сёйлевюн Магьмут Амиралиев.

Оьзюню сёйлевюнде районну гьакимбашы районну юрт хозяйство комплексини ишине айрыча тергев бакъдырып сёйледи.

«Артдагъы йылларда пачалыкъ­ны ва халкъны янындан юрт хозяйство производствону гётеривге, юрт хозяйство продукталар болдурувну къадарын артдырывгъа тергев гючленген. Биринчилей, бизин уьлкеге къаршы Европаны кёбюсю пачалыкъ­лары билдирген экономика санкциялар себеп. Айтма тарыкъ, бизин районну юрт хозяйство продукталар болдурувчулары тувулунгъан гьалдан уста кюйде пайдаланып, тыш пачалыкълардан гелеген хаммал аз болгъан базарланы елемек учун бары гючюн салгъан ва яхшы темплер де алгъан.

Гьалиги шартларда тыш пача­лыкълардан гелеген продукцияны ерин 2022-нчи йылны июль айыны 14-нде къабул этилген №316-Федерал закон ерли аграрийлеге яхшы шартлар ярата. Айтагъаным, КФХ-ны башчыларына аукционсуз 5 йылгъа ишлетме топуракъ алма ихтияр бере. Шо буса пачалыкъны юрт хозяйство министерлигинден таба этилеген кёмеклерден генг кюйде пайдаланма имканлыкълар ярата.

Орта, увакъ далапчылыкъ булан доланагъан ёлдашлагъа 2020-нчы йылда кёмек гьисапда гёрюлген антикризисный чаралар да яхшы натижа бере эди. Шо чаралар 2023-нчю йылны ахыры болгъунча узатылажагъын ол эсгерди. Топуракъгъа тёлейген налог 1,5-ни орнуна 1, мал-матагь налог 1,3-ден 1 ставкагъа ерли тёбенлешген.

Гёрюлген налог енгилликлер налогланы жыйылывуна бирдокъда тогъас болмады, уьстевюне 2022-нчи йылда 2021-нчи йыл булан тенг­лешдиргенде налогланы жыйылыву 25694,7 минг манатгъа артгъан.

Чарада оьзюню сёйлевюн давам эте туруп районну башчысы М.Амиралиев районда туризмни оьс­дюрмекни, районну халкъыны ял алывуна шартлар болдурувда этил­ген ишлени уьстюнде токътап сёйледи.

Арив безендирилген «Волна» деген муниципал пляж – адамлар, туристлер арив ял алагъан ер. Булар булан битип къалмай, Къарабудагъгент районну территориясында къонакъ уьйлер къурула ва къурма гёз алгъа тутулгъан. Демек, «Каспий-Марина» ва «Аль-Каср» шолайлардан санала. Эки де объект «Каспий» санаторияны ювугъунда ерлешген. Булар ва районну муниципал къурулувларында къурулагъан оьзге объектлер халкъланы яшав янына яхшы яндан таъсир эте. Районгъа гелеген туристлени санавун артдырмакъ, оланы ял алывуна онгайлы шартлар яратмакъ учун бизден болагъан бары гьаракат этиле»,- деди Магьмут Амиралиев.