Депутатлар тергевюн этди
Артдагъы йылларда районубузну юртларында социал биналар къурула ва олагъа капитал ремонт этиле. Аслу гьалда шо биналарда билим берив, савлукъ сакълав, маданият ва спорт тармакъны касбучулары иш гёре. Районубузну гьакимбашы Магьмут Амиралиевни гьаракаты ва гьай этивю булан артдагъы йылланы ичинде милли проектлеге ва оьзге пачалыкъ федерал программалагъа гёре школалар, яшлар бавлары, маданият ожакълар булан бирче ата-аналагъа ва яшлагъа ял алмагъа майданчалар къурула, орамлагъа ва ёллагъа мукъаятлы кюйде ремонт ишлер этиле.
Районубуздагъы юртларда къурулагъан шолай социал биналагъа тергевюн болдурмакъ муратда алдагъы гюнлерде, ачыкълашдырып айтгъанда, 21-нчи мартда, ДР-ни Халкъ Жыйыныны билим берив ва илму комитетини ёлбашчысы Елена Павлюченкону ва депутатларыны тергев сапары болду.
Инг башлап олар Янгы Паравулда къурулагъан янгы школаны бинасында болдулар. Магьачкъаладан гелген къонакъланы район администрацияны жаваплы къуллукъчулары социал къурулушлагъа тергев болдурувунда узатдылар.
Янгы Паравулда 400 охувчу яш тарбияланмагъа ва билим алмагъа болажакъ кюйде 3 къабатлы школа ишленип тура. Бугюнлерде шо школаны 3-нчю къабатыны тамлары да ишленип бите тура деп айтмагъа ярай. Республиканы гьакимлери ишни барышына рази къалдылар ва шо ерде оьзлени таклифлерин бердилер.
Янгы Паравулдан делегация районубузну ичиндеги гиччи юртланы бириси Жангагъа тербендилер. “Билим берив” деген милли проектге гёре Жанга юртда 120 гиччипавну тарбияламагъа болагъан янгы яшлар бавуну бинасы къурулуп битген. Шо гюн тергев болдурагъан ёлдашлар эсгерилген яшлар бавуну тыш янына ва ичине къарап чыкъдылар.
Демек, гиччипавлар сакъланагъан уьйлеге, актовый ва спортзаллагъа, аш биширилеген ашханагъа, ашамлыкъ ва сурсат продукталар сакъланагъан гьамаргъа, гьаваны тазалайгъан вентиляция ва иссиликни болдурагъан котельный системалагъа да олар оьзлени тындырыкълы кюйде тергевюн этдилер. Шо ерде де къонакълар янгы яшлар бавун пайдаландырывгъа бермек учун тарыкъ-герек ишлени де яшавгъа чыгъармагъа тапшурдулар.
Жангадан сонг ДР-ни Халкъ Жыйыныны депутатлары Къарабудагъгент юртгъа ёлун узатдылар. Белгили кюйде, юртну «Таха-баш» микрорайонунда 700 охувчу яш сыягъан янгы школаны кюрчюсю салынгъан ва бетон ишлери юрюлюп тура. Тергев болдурагъанлар социал бинаны къурулушуна къуршалгъан хас техниканы ва ишчилени ишлейген кююне рази къалдылар. Шо ерде эсгерилген йимик, Къарабудагъгент юртда янгы школа гьалиги заман талап этеген стандартлагъа ва проектлеге гёре къурулажакъ.
Республикабызны парламентини депутатларын шо гюнгю сапарында районну администрациясыны башчысыны орунбасары Жалалутдин Жамалутдинов, депутатланы район Жыйыныны ёлбашчысы Адил Салаватов, архитектура ва къурулуш бёлюгюню ёлбашчысы Абдулла Гьажиев, билим берив управлениени ёлбашчысы Тажли Хирзиева ва районну оьзге бёлюклерини къуллукъчулары къаршыладылар ва узатдылар.
Озокъда, школаланы ва яшлар бавланы къурагъан къурулуш бирлешивлени ёлбашчылары да оьзлени иш ерлеринде бар эдилер. Олагъа тергев болдурагън депутатлар ва район администрацияны вакиллери юрюлюп турагъан ишлени гьакъында оьзлени таклифлерин бердилер.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
