Таъсирли ёлугъувлар

Бугюнлерде ол къысгъа болжалгъа ял алмагъа уьюне йиберилген. Юртгъа гиргендокъ, ол экинчи класда билим алагъан оьзюню къызы Зулгьижа булан ёлукъмакъ учун ерли школагъа алгъасагъан. Бир-биревню гёрмей оьтген заманны ичинде сагъынгъан атасыны ва къызыны шо гюнгю ёлугъуву бек таъсирли оьтген.

Шондан сонг, эсгерилген охув ожакъны ёлбашчысы Алимагьаммат Мусаев школада чалышагъан муаллимлени ва бары да юртлуларыны атындан Илмутдин Муртузаевге яхшы савлукъ да ёрап, огъар элин якълавдагъы къуллукълары учун разилигин билдирген.

И. Муртузаев де оьз гезигинде муаллимлер булан оьт­герилген лакъырлашывуну барышында яшлар хас асгер гьаракатгъа къуршалгъанлагъа йибереген савгъатлар булан олар язагъан кагъызлар бизин уланланы къолуна тюшегени гьакъда айтгъан. Этилеген шолай тергев оьз­лени айрыча ругьландырагъанын да ташдыргъан.

Шондан къайры да, росгвардияда къуллукъ этеген бугюнлерде Украинада юрюлеген хас асгер гьаракатгъа къуршалгъан Магьаммат Гандаевни уьягьлюсю Мадина да алдагъы гюнлерде Янгы Паравулдагъы орта школада болгъан. Ол билдиргени йимик, эсгерилген охув ожакъгъа ол оьзюню яшав ёлдашыны тапшурувуна гёре гелген.

Ону сёзлерине гёре, шо охув ожакъда билим алагъан Лилия Къурбановагъа разилигин билдирмек оьзюню школагъа гелмеклигине аслу себеп болуп токътагъан. Белгили экени йимик, Лилия буссагьатгъы вакътиде Украинадагъы бизин асгерлеге кагъыз язывгъа байлавлу болуп, бютюнроссияны оьлчевюнде гьали-гьалилерде отгерилген гьаракатда ортакъчылыгъын болдургъан. Ачыкълашдырып айтгъанда, Магьаматгъа багъышлап ол язгъан шиърусу огъар етишген.

Лилия атасыз оьсегенгедир, бизин солдатланы къысматы ону гьакъ юрекден ойлашмагъа борчлу эте. Балики, шо саялыдыр ону къаламындан тюшген шиъру сатырлар да таъсирли чы­къ­гъан. Шо шиъру сатырлар ­оьзюне айрыча таъсир этгенге гёре, Магьаммат охувчу къызгъа уьягьлюсюнден таба разилигин билдирмеге ва гиччирек савгъан тапшурмагъа тийишли гёрген.

Лилия да оьзю язгъан кагъыз Магьамматгъа етишгенине оьтесиз бек сююнегенин билдирген. Шо гюн школагъа гелген къонакъгъа охув ожакъны ёлбашчысы А. Мусаев гюл байлам тапшура туруп, ону оьтген 8 Март байрам булан да къутлагъан.