Игитлерибиз редакцияда къонакълыкъда

Россия давну яны тюгюл, тек ­оьзлени халкъын ташлаймайгъанны бирдагъы керен исбатлады.

Украинада фашизмге, миллетчиликге къаршы юрюлеген хас дав чарада бизин макътавлу воинлерибиз, дыгъар булан къуллукъ этеген, мобилизация чара булан баргъанлар дав майданларда бендерлеге, фашистлеге, миллетчилеге къаршы къоччакъ кюйде ябушув юрюте, игитликлер гёрсете, командование авгъа салгъан тапшурувланы уьлгюлю кюйде кютелер.

Хас дав чарада ортакъчылыкъ этегенлени арасында бизин райондан, Къарабудагъгентден баргъанлар да оьзлени лап бажарывлу , къоччакъ янындан гёрсетип, фашистлер булан къоччакъ кюйде ябушалар.

Дыгъар, мобилизация булан яда гёнгюлю кюйде Украинада юрюлеген давда ортакъчылыкъ этеген къарабудагъгентлилени бирлери къысгъа болжаллы отпуска булан ата юртунда.

Район газетни баш редактору Асадулла Гьажиевни сиптечилиги, Къарабудагъгент юртну жамият палатасыны ёлбашчысы И.Къаранаевни, район Жыйынны депутаты Магьамматсалам Багьриевни актив кёмеги булан редакцияда Украинада хас дав чарада ортакъчылыкъ этеген Зайнитдин Исмаилпашаевич Насрутдинов, Али Бадрутдинович Къаранаев булан ёлугъув болду ва газетни къуллукъчусу Ш. Къайирбеков олардан Украинадагъы хас дав чарагъа, авлакъ шартларда яшав-турушгъа байлавлу соравлар берип жаваплар алды. Айтма тарыкъ, шо гюн редакцияда къонакълыкъда болгъан эки де къоччакъ уланларыбыз оьмюрге жагьил адамлар буса да, Украина булангъы дав къалмагъал оланы ругь якъдан бек чыныкъдыргъан, олагъа къарасанг, алдынгда бай яшав сынаву булангъы эсли адамлардыр деп, эсинге геле. Олар давну гьакъында да кёп зат айтмай. “Биз уьст болажакъбыз, неге тюгюл бизин асгерлер тюзлюкню яны”,- деп битдирип къойдулар.

Зайнутдин Насрутдинов Къарабудагъгент юртда тувгъан. Бир номерли орта школаны битдирген. Школаны битген сонг Зайнутдинни Ватанны алдындагъы борчун кютме армиягъа чакъыра. 2003-2005-нчи йылларда Владивосток шагьарда денгиз пехотада гьалал кюйде къуллукъ этип къайта. Армиядан къайтгъан сонг дыгъар булан Чечен республиканы Наурский районуну Калиновская станциясында къуллукъ эте.

З.Насрутдинов хас дав чара билдирилип биринчи гюнюнден тутуп, демек, 2022-нчи йылны феврал айыны 24-нден башлап дазулангъан хас дав чарада ортакъчылыкъ эте. Ачыкълашдырып айтгъанда, 71-нчи гвардия мотострелковый полкну хас инженер сапер ротасында (ИСР).

Бир йылны узагъында Зайнутдин Насрутдинов оьзю къуллукъ этеген бёлюкню ёлбашчылары алгъа салгъан тапшурувланы къоччакъ, бажарывлу кюйде кютюп, оланы разилигин къазанма бажаргъан.

Дав майданларда бажарывлулукъ, игитлик, къоччакълыкъ гёрсетгени саялы, РФ-ни якълав министерлигини 597 номерли буйругъу булан 2022-нчи йылны июн айыны 28-нде 2-нчи даражалы «За доблестную службу» деген медал булан савгъатлангъан.

З.Насрутдинов уьйленген, ону уьч авлети бар.

Бизин экинчи игитибиз Али Къаранаев де Къарабудагъгент юртда тувгъан, Къарабудагъгент 5 номерли орта школаны битдирген. Школаны битдирген сонг ол армияны сыдраларына къуллукъ этме чакъырылгъан. Владикавказда къуллукъ этип ана Ватаныны алдындагъы сыйлы борчун кютюп ата юртуна къайтгъан.

Армияда къайтгъан сонг Али ата-анасына кёмек къолун ялгъай туруп, гьар тюрлю ишлени кютюп, ожакъгъа пайда гелтирип тургъан.

2022-нчи йылны октябр айыны 8-ден тутуп мобилизация чара булан Украинадагъы хас дав чарада ортакъчылыкъ эте. О да юртлусу Зайнутдин йимик инженер-сапер ротада къуллукъ эте. Ол да белюкню командованиеси алгъа салгъан тапшурувланы бир де артгъа тартынмай, къоччакъ кюйде кютюп юрюй.

“Али, сагъа не йимик савгъатлар берилген?”,- деген соравубузгъа ол: – “Биз медал, оьзге савгъат учун дав этмейбиз. Биз ДНР-ни, ЛНР-ни, Херсон, Запорожье областланы халкъларын фашизмден, миллетчиликден къорумакъ учун дав этебиз. Савгъат буса сонг болур”, — деди. “Биз тюзлюкню, парахатлыкъны якъчыларыбыз. Бизин ёлубуз тюз-тюзлюк буса гьаманда уьст бола, биз де уьст болажакъбыз”,- деп иржайды бизин гьалиги девюрюбюзню игитлери.

Бизге буса тюзлюк учун ябушув юрютеген воинлерибизге уьстюнлюк ёрап, эсен-аман ожакъларына­ къайт­ма насип болсун демек къала.