Музейни юбилейи
Къарабудагъгент районну Дёргели юрту бай тарихи булангъы юртланы бириси. Яшлар билим алсын, гележекге абат алсын учун бу юртдагъы 2 номерли орта школада ишлейгенлер кёп къаст эте.Олар яшлар булан экскурсиялагъа бара, гьар тюрлю байрам чаралар оьтгере, ата юртуну, районну, савлай Дагъыстанны тарихин тас болма къоймай сакъламакъны гьайын эте.
16-нчы февралда эсгерилген школада тарих музейни 10 йыллыкъ юбилейи оьтгерилди. Бу байрамгъа музейни ёлбашчысы Магьамматбашир Атагишиев, школаны муаллимлери ва охувчу яшлар тындырыкълы кюйде онгарылгъан эди. Айрокъда, оланы уьстюндеги милли опуракълары къарагъанланы иштагьлыкъгъа къалдырар йимик эди.
Байрамны ача туруп, школаны 11- нчи класыны охувчу къызы Жаватова Зарият бары да гелген къонакълагъа, байрамны оьтгерме гьаракат этип чалышгъан муаллимлеге баракалласын билдирди.
Дёргели 2 номерли школада тарих музей иш гёрегенли 10 йыл тамамланды. Шо заманны ичинде музейде кёп иш этилинип гёрсетилинген. Мунда ачыкъ дарслар,эл ахтарывчуланы ёлугъувлары, къумукъ халкъ авуз яратывчулугъуна багъышлангъан ярышлар, дагъыстан халкъны адатлары ва маданияты гьакъда дарслары оьтгериле.
Музейни ёлбашчысы кёп-кёп конкурсларда ортакъчылыкъ этип, гьюрметлев грамоталар, баракалла кагъызлар алгъан.
Бу йылда «Лап да яхшы школа музейи» деген республика конкурсунда алдынлы ер алып, республика конкурсунда да музей 1-нчи ерни алма бажаргъан.
Озокъда, булай мажлисге кёп къонакълар чакъырылгъан эди.Шатлы чарада чыгъып сёйлеген Дёргели юртну башчысы Гьамзат Мурзаев, Дагъыстан маданиятыны ат къазангъан къуллукъчусу, юрт китапхананы заведующийи Изиева Айшат, Къарабудагъгент районну билим берив управлениясыны ишчилери Райсанат Унаева, Осман Ражапов, Нурият Салаватова, 1 номерли Дёргели орта школаны директору Рашияханум Алпанаева, Эрпели школаны тарбия ишлеге къарайгъан орунбасары Гьайбулла Гьайбуллаев,Таргъу школаны директору Камалутдин Межитов, 60 номерли Магьачкъала школасыны директору Иса Агьматов, 59 номерли Магьачкъала школасыны директору Ибрагьим Байсонгуров, Гьели орта школасыны эл ахтарывчусу, тарихчи Хосар Хосаров булай уллу ва пайдалы мажлисни онгаргъан ва тизген Дёргели 2 номерли орта школаны музейини ёлбашчысы Магьамматбашир Атагишиевге разилигин ва баракалласын билдирдилер. Олай да, чарагъа Къарабудагъгент маданият къаласыны йыравлары Абдулазим Наибханов ва Аскендер Исрапилов оьзлени йырларын йырлап, шатлы гьислер къошду. Байрамны тамамлай туруп, Дёргели 2 номерли школасыны ёлбашчысы Алимурат Байсонгуров гелген къонакълагъа баракалла билдирди. Озокъда, мажлисни ахырында тюрлю-тюрлю къумукъ милли ашлар, сувлар берилди ва эсделикге кёп санавда сурат чыгъарылды.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
