Сиз сорайсыз, биз жавап беребиз

Бир тайпа ёлдашлар: «Бизге сувлакъ деп сугъарма сув ёкъ ерлени берген, онда не чачып болабыз?!»- дей болалар. «Шо топуракълагъа люцерна чачса, нечик болур?»,- деген соравну берегенлер де бар.

Люцерна оьсюмлюк, агротехника гёрсетеген кюйде, сугъарылагъан участкалагъа чачыла. Тек, мен редакцияда ишлейген кёп йылланы ичинде районну бары да хозяйстволарыны топуракъларындан айлангъанман, ем топлавчулар булан ёлукъгъанман. Бугюн йимик эсимде, «Губден» совхозда, участканы аты эсимде къалмагъан, ем топлавчуланы янында болгъанда, къургъакъ топуракъларда люцерна тайланы кёплюгюн гёргенде, гьайран болдум. Мени авлакъчыланы янына узатагъан совхозну касбучусу мени тамаша болгъанымны гьис этгенде: «Люцерна къургъакъда да яхшы тюшюм бере, тек сувлакъда йимик 3-4 керен чалма бажарылмай, эки керен чалабыз. Биринчи керен чалагъанда сувлакъда йимик масса чыгъа, экинчи чалагъанда, чакъдан гьасил бола, яй явунлу гелсе, гьасиллер яхшы бола»,- деди.

Мен Дёргели юртну Тёбен-Жюнгютейге барагъан ёлуну сол янында къургъакъда чачылгъан люцерна тарлавдагъы кёп тайланы да гёргенмен. Бир сёз булан айтгъанда, къургъакъгъа да люцерна чачып, яхшы тюшюм алма бола. “Къарабудагъгент юрт” муниципал къурулувну шартлы сугъарылагъан топуракъланырына люцерна чачгъанлар да бар.

Люцерна тайны гьали яхшы багьасы бар. Бир керен чачсанг, чыгъыву яхшы болса, 4-5 йылны узагъында эки керен чалып тюшюмюн алма бола. Люцерна чачмакъ учун чыкъгъан харжланы къайтарышыны гьисабын этме сизге къоябыз. Амма топуракълар ишлетилме гереги гьакъ…