Меню
16+

Сетевое издание "Району яшаву"  «Будни района»

29.04.2022 09:12 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Парахатлыкъда ва шатлыкъда оьтгермек учун

Автор: Шихав Къайирбеков

Байрам гюнлер ювукълашып геле. Язбашны байрамларын лайыкълы кюйде къаршыламакъ учун, районубузну территориясында тазалыкъны болдурувда, Уллу Ватан давда ва оьзге агьвалатларда жанын къурбан этгенлени эсделигине салынгъан монументлени, олагъа барагъан ёлланы айланасын безендиривде, тазалыкъны болдурувда кёп иш этилген.

Бу йыл Совет Халкъ Уллу Ватан давда уьст гелгенли 77 йыл бите. Май байрамланы, Уллу Уьстюнлюкню Гюнюн бу йыл оьзге ерлерде йимик шатлыкъны шартларында къаршылама гёз алгъа тутулгъан. Озокъда, шатлы чаралар парахат­лыкъда ­оьтгерилме тюше.

Апрель айны 26-нда, районда байрам гюнлени парахатлыкъда, шатлыкъда оьтгермек учун, терроризмге къаршы иш гёреген комиссияны генглешген генгеши оьтгерилди.

Генгешде районну башчысы Магь­мут Амиралиев, районну ихтияр якълав, къорув къурумларыны вакиллери, ондан къайры ДР-ны Халкъ Жыйыныны депутаты Магьамматов Магьаммат Магьамматсолтанович ва оьзге жаваплы къонакълар ортакъчылыкъ этдилер. Чараны районну башчысы М. Амиралиев юрютдю. Ол оьзюню къысгъаракъ сёйлевюнде булай деди:

-Коронавирус инфекция аврув себеп болуп, Роспотребнадзор шатлы чараланы оьтгерме буюрмай эди. Гьали пандемияны къоркъунч­лугъу ёкъ. Шо саялы биз районда Уллу Уьстюнлюкню 77 йыллыгъын оьр даражада оьтгерме, давну ортакъчыларыны эсделигине салынгъан монументге гюл байламлар салма, шатлы чаралар оьтгерме къастыбыз бар.

Районда Уллу Уьстюнлюкню Гюнюн оьр даражада оьтгермек учун гьазирлик гёрювде, гёз алгъа тутгъан ишлени гьакъында районну башчысыны орунбасары Жалалутдин Жамалутдинов маълумат берди. Ону сёйлевюнден ачыкъ болгъаны йимик, май байрамлагъа гьазирлик гёрюв ишлер районну башчысы тасдыкъ этген плангъа гёре юрюле. Байрам шатлыкъланы къурумлу ва оьр даражада оьтгермек учун жаваплы ёлдашлар, этилме герекли ишлени болжаллары токъташдырылгъан.

Ж.Жамалутдинов оьзюню сёйлевюнде районну 14 муниципал къурулувунда Ватан учун, бизин гележек яшавубуз саялы дав майданларда жанын къурбан этген воинлерибизни гьюрметине эсделик монументлер барын эсгерди. Къарабудагъгентде Уллубий Буйнакскийни атындагъы ял алагъан бавда монументден къайры да Афгъан агьвалатларда ва парахат девюрде игит кюйде жанын къурбан этген органланы къуллукъчуларыны эсделигине салынгъан монументлер де бар. Бугюн бизин алдыбызда токътагъан аслу борч – байрамлагъа гьазирлик гёре туруп, мемориал объектлеге ремонт, реставрация этмек, айлана ягъын таза сакъламакъ. Бугюнлерде шолай ишлер юрюлюп тура.

Жалалутдин Жамалутдинов оьзюню сёйлевюнде Уллу Уьстюнлюкню 77 йыллыкъ айланывун лайыкълы къаршыламакъ учун гёрюлеген чараланы айрыча эсгерди.

Масъала, районну бары да школаларында Уллу Ватан давгъа багъышланып ачыкъ дарслар, школадан тышгъари чаралар, давгъа багъышланып язылгъан асарланы охув ва оьзге ишлер оьтгериле. Юртланы китапханаларында «Бизинкилер учун», «Уллу Уьстюнлюк», «Уьстюнлюкню наслулары» деген выставкалар юрюле.

Докладчыны сёйлевюнден ачыкъ болгъаны йимик, районну территориясында оьтгерилеген чаралар роспотребнадзорну ва районну ич ишлер бёлюгюню талапларына гёре оьтгерилежек.

Апрель айны 26-дан тутуп бу йыл­ны июнь айыны 22-не ерли «Эсделикни Вахтасы-77» деген акция юрюле. Шо болжалны ичинде эсделик монументлени къырыйында жамият вакиллени, яшёрюм къурумланы, волонтерлар, школаланы охувчуланы, воин-интернационалистлени, оьзге агьвалатланы ветеранларыны ортакъчылыгъы булан чаралар оьтгерме гёз алгъа тутулгъан.

Апрель айны 26-дан май айны 9-зу болгъунча «Георгий лентни» деген акция юрюлежек. Шо гюнлени ичинде Россияны миллионлар булан ватандашлары Ватан учун ябушгъан солдатланы эсделигине гьюрмет этип, ленталаны тагъажакъ. Акцияны вакътисинде волонтерлар районда, райцентрде 3 мингден де къолай ленталар уьлешежек.

Уллу Уьстюнлюкню Гюнюне багъышланып 7-нчи майдан 9-нчу май болгъунча спорт чаралар оьтгерилежек. 7-нчи майда Къарабудагъгентде атлар чапдырыв ва спортну милли жураларындан спартакиада болажакъ.

9-нчу майда Гьелиде яшланы арасында тутушуп ябушувдан ва путлукъ атыв спортдан турнир оьтгерилежек.

8 ва 9 майда Дёргели юртда Уллу Уьстюнлюкню гюнюне багъышланып тутушуп ябушувдан ва путлукъ атывдан ярышлар оьтгерилежек.

Май айны 1-нден 9-зу болгъунча райцентрда давгъа багъышлангъан кинолар гёрсетилежек.

8 майда Уллу Уьстюнлюкню Гюнюне ва бизин савутлу гючлерибиз Украинада оьтгереген хас чараны якълап, Къарабудагъгентни территориясында «Эсделикни ёлу» деп машинлени колоннасы оьтежек. Оларда Россияны армиясын ва Донбассны ватандашларын якълайгъан «Z» ва «V» деген белгилер болажакъ.

Уллу Уьстюнлюкню 77 йыллыгъына багъышланып Манас дёгерекде, Къарабудагъгентге гиреген ерде «Уьстюнлюкню Байракълары» илинежек.

Район администрацияны бинасыны алдында ярыкъландырылгъан «Z» ва «V» белгилер ясандырылажакъ.

Терроризмни алдын алывгъа байлавлу оьтгерилген генглешген жыйында оьзюню сёйлевюн тамамлай туруп, Ж. Жамалутдинов май байрамлагъа ва Уллу Уьстюнлюкню 77 йыллыгъыны гьюрметине районда оьтгерилеген бары да чаралар районну маълумат къуралларындан таба генг кюйде халкъгъа малим этилежеги гьакъда да эсгерди.

Терроризмге къаршы иш гёреген комиссияны генглешген жыйынында шатлы байрам гюнлени оьтгеривде аманлыкъны болдурувгъа байлавлу оьтгерилежек чараланы гьакъында полицияны вакили Батдал Альбориев баянлыкъ берди. Ону сёйлевюнден ачыкъ болгъаны йимик, байрам гюнлер полицияны къуллукъчулары артдырылгъан режимде ишлежегин, адамлар кёп жыйылагъан ерлерде полицияны къуллукъчулары дежурналыкъ этежегин, районну ватандашларыны аманлыгъын, ерлерде низамны болдурмакъ учун, полицияны район бёлюгюнде чаралар гёрюлгенин ачыкълашдырып сёйледи.

Чарада гьасил чыгъарып сёйлевюнде районну башчысы М.Амиралиев етишип гелеген май байрамланы, Уллу Уьстюнлюкню 77 йыллыгъын оьр даражада, шатлыкъны шартларында, оьтгерилежегин Ватан давну ва оьзге агьвалатланы къурбанларыны эсделигине салынгъан монументлеге жанлы гюл байламлар салынажагъын эсгерди. Байрамланы къурумлу оьтгеривге жаваплы ёлдашлагъа тийишли гьазирлик гёрме тапшурувлар берди.

Чарада сёзюн тамамлай туруп, М.Амиралиев районну халкъын етишип гелеген сыйлы Ораза байрам булан къутлады.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2