Маълумат сагьат оьтдю

Алдагъы гюн бу агьвалатгъа байлавлу болуп районну маданият ва туризм ишлеге къарайгъан бёлюгюню сиптечилиги булан МБОУ «Гимназияны» оьр класларыны охувчулары «Къарабудагъгент юрт» муниципал къурулувда къонакъ­лыкъда болгъанлар.

Районну маданиятгъа ва туризмге къарайгъан бёлюгюню ёлбашчысы Найида Мурзаева юрт администрацияны къуллукъчуларын Ерли гьакимият къурумланы байрам гюню булан къутлагъан.

Ерли гьакимият къурумлар ­халкъгъа лап да ювукъ. Адамлары бу къуллукъгъа гьар гюн оьзлер къыйыны-тынчы булан гелелер. Ерли гьакимият къурумланы къуллукъчуларыны оьзлени тапшурувларына намуслу янашывундан ерлерде бар масъалаланы чечивде, ватандашланы яшав даражасын яхшылашдырыв­да, юртну ичиндеги масъалаланы алдын алывда ва яшавгъа чыгъарывда жавапчылыгъы уллу. Ерли гьакимият къурумланы къуллукъчуларыны гьаракатындан юртланы оьсювю, яшавлукъ-коммунал масъалаланы яшавгъа чыгъыву, юрт ерлерде тазалыкъны болдурув гьасил болагъаны ачыкъ.

Чарада баш китапхананы къуллукъчусу Азинат Пашаева охувчу яшлагъа Ерли гьакимият къурумланы гюнюню тарихи, ону агьамиятлыгъы гьакъда мукъаятлы, далиллер гелтирип, англатывлар берди. Охувчу яшланы ­оьзлер яшайгъан ерлерде тюрлю-тюрлю масъалаланы яшавгъа чыгъарывда ватандаш активлигин гёрсетме, ­юртну масъалаларын чечивде болгъан кюйде, гючюне гёре къол ялгъама чакъырды.

Чарада «Къарабудагъгент юрт» муниципал къурулувну башчысы Магьамматсолтан Гьасанов администрациягъа гелген яшлагъа ерли гьакимият къурумланы иш юрютюв къайдалары, юртда этилген ишлер булан таныш этди, бар масъалаланы англатып сёйледи.

Баш китапхананы къуллукъчулары Ерли гьакимият къурумланы гюнюне багъышлап онгаргъан выставка да жыйылгъанланы тергевюн тартардай безендирилген эди.