Спорт – яшавну нормасы

Чараны гиришив сёз булан районну башчысыны орунбасары Жалалутдин Жамалутдинов ачды ва юрютдю.

Чарада районда ватандашланы савлугъуну гьайын эте туруп, оланы физический тарбиялавда, спорт-масса ишлени салынгъан кюю, гьакъда маълумат берме районну спорт ишлеге къарайгъан комитетини ёлбашчысы Завур Умаракъаевни сагьнагъа чакъырды.

Завур Умаракъаев сёзюн булай башлады:

- 2021-нчи йылда районда комплекс ГТО-ну оьтгермек учун 5 муниципал чара оьтгерилди. Натижада гетген йыл районда ГТО-ну нормасын беривде муниципал этапда – 470, республика этапда 200 адам ортакъчылыкъ этген. Шоланы 50-си ГТО-ну «алтын» значогуна ес болгъан.

Оьзлени савлугъуну гьайын эте туруп районда физический культура, спорт булан машгъул болагъанланы санаву артып юрюй. Буссагьатгъы вакътиде районда умуми алгъанда ватандашланы 40 проценти спорт булан машгъул.

Районда гьар-тюрлю оьлчевлерде 19 футбол майданча бар. Ондан къайры да ГТО-ну нормаларын беривге гьазирлик гёрмек учун 4 воркаут спорт майданча пайдаландырывгъа берилген. Умуми алгъанда 32 спорт площадка иш гёре. Гьакъыкъатда, районда 119 спорт къурулуш бар. Шоланы 31 ябыкъ, 80 ачыкъ, 8-зи спорт булан машгъул болма ярайгъан ерлер.

Завур Умаракъаев оьзюню сёйлевюнде, ГТО-ну гьакъында айта туруп, 2022-нчи йылны биринчи квартатлында этилген ишлени де аян этди.

2022-нчи йылда ГТО-ну нормасын беривде 93 адам ортакъчылыкъ этген. Демек, къышлыкъ этабында – 27, язбашгъы этабында – 66 адам ортакъчылыкъ этген.

Чарада докладчыгъа спортгъа, ГТО-ну нормаларын беривге байлавлу болуп гьар тюрлю соравлар берилди. Масала, ГТО-ну оьр къыйматгъа берген оьр класланы выпускниклерине не йимик енгиллик бола деген сорав арагъа чыкъды.

Районда спорт-масса ишлени куратору, районну башчысыны орунбасары Жалалутдин Жамалутдинов районда спорт ишлени гьакъында айта туруп, районда башында оьзю де булан спорт-масса ишлени жанландырма, юртланы башчыларын, къурумланы ёлбашчыларын спорт булан машгъул болма чакъырды.