Шатлы чара оьтгерилди

Чараны барышында район администрацияны башчысы Магьмут Амиралиев, оьзге ёлдашлар ва маданият тармакъны къуллукъчулары ­оьзлени ортакъчылыгъын болдурдулар.

Чараны онгаргъан ва юрютювчю, район администрацияны маданият ва туризм ишлеге къарайгъан бёлюгюню ёлбашчысы Найида Мурзаева, оьзюню гиришив сёзюнден сонг, районну гьакимбашы Магьмут Амиралиевге сёз берди.

- Жамиятны ругь байлыгъын сакълавда, якълавда ва гётеривде сизин къошумугъуз гёрмекли ва лап да тарыкълы. Оьтген 2 йыл­ны узагъында маданият къуллукъчулар ­ халкъны ругьун ва гёнгюн гётермеге болушлукъ этдилер. Сизге къатты савлукъ, ожакъларыгъызгъа насип ва берекет, ишигизде уьстюнлюклер ва оьрлюклер ёрайман, — деди М.Амиралиев.

Олай да, шатлы чараны барышында афгъан ветеранланы Союзуну район бёлюгюню ёлбашчысы Т.Алиев, Жамият палатаны ёлбашчысы А.Мамагишиев, этнодворну директору З. Абакарова маданият тармакъда кёп йылланы боюнда уьлгюлю кюйде загьмат тёкген къуллукъчуланы гьакъында маълуматлар булан сёйледилер.

Генгешде район администрацияны башчысыны орунбасары Ж. Жамалутдинов маданият тармакъда уьстюнлюклер гёрсетип чалышгъан бир-нече ёлдашгъа ДР-ни Маданият министерлигини ва район администрацияны атындан гьюрметлев грамоталар ва баракалла кагъызлар тапшурду.