Тил – миллетни жанлы эсделиги

Ана тилге багъышлангъан плакатлар, тамгазетлер ва Ана тилге багъышлангъан плакатлар, тамгазетлер ва выставка булан безендирилген класны ичинде школаны охув-тарбия ишлеге къарайгъан завучу Б.Къысгъагьажиева, психологу Н.Агьматова, муаллимлер ва 1,2,3,4,5,6 класланы охувчулары ерлешип олтургъан сонг, китапхананы ёлбашчысы чараны ачды ва жыйылгъанланы Ана тилни халкъара гюню булан къутлады.

Чараны ол шаир Нюрьяна Арсланованы ана тилге багъышлангъан шиърусу булан башлады. Сонг ол чараны юрютмеге 9-нчу класны охувчулары Л.Гьанипаевагъа ва А.Гьажиевагъа сёз берди. Олар, биринден бири алып, ана тилни асиллиги гьакъда айтды.

Чарада 1-нчи «а» ва «б» класланы охувчулары: М.Гьанипаев, А.Гьанипаев, А.Алиев, Ж.Алиев ана тилге багъышлангъан шиъруланы охудулар. Сёз берилген 6-нчы класны охувчусу Д.Амаев «Дагъыстаным» деген шиъруну гё­нгюнден охуду.

Къумукъланы милли адатына гёре ана тилде яшгъа къакъакъ йырланы йырлама 4-нчю класны охувчу къызы Г.Муттагьировагъа сёз берилди. Ол оьзюню арюв тавушу булан яшына ана айтагъан, гиччиден тутуп ана тилге сюювюн сингдиреген къакъакъ йырланы йырлады.

Сонг сёз берилген охувчулар: М.Вагьитова, Я.Гьюсейнова, А.Исрапилова, А.Алиева, М.Кан­зитдинова, А.Къочакъаева ана ­тилге багъышлангъан къумукъ шаирлени шиъруларын охудулар.

Чараны узата туруп, ону юрютювчюлери:

- Бугюн биз оьз миллетибизни тилибизни, ата-бабаларыбыздан къалгъан адатланы, милли игитлерибизни билме тарыкъбыз. Ана тилибиз милли къультураны, адабият ва тарихибизни сакълайгъан инг де аслу къурал. Ругь байлыгъыбыз булан бирче бизин тил байрыгъыбыз да оьсме тарыкъ. Бизин юртну Бекенез булагъындагъы таза, сюзюк суву йимик, таза ва аявлу ана тилибиз де болма герек…, — деди.

Чарада ортакъчылыкъ этген «Районну яшаву» газетни жаваплы секретары булай терен маъналы ва къурумлу чара оьтгергени саялы школаны коллективине, охувчуларына разилигин билдирип сёйледи.

- Ана тилге багъышланып оьтгерилген чарагъа, гертилей де, бек арив, гьаракат этип онгарылгъаныгъыз аян болду. Охувчуланы къурч шиъруларына тынглап бек хош болдум.

Аявлу охувчулар! Сиз шиъруланы биригизден-биригиз арив охудугъуз. Энниден сонг да шулай арив чараланы кёп оьтгермеге, ана тилибизни сюймеге сизин чакъыраман. Сизге савлукъ, кёп яхшылыкълар, пайдалы адамлар болуп, ата-анагъызны, муаллимлеригизни оьктем этердей уьстюнлюклер ёрайман, — деди ол.