Афгъанлылар даим эсибизде
Белгили кюйде, гьар йыл февраль айны 15-нде Россияда воин-интернационалистни гюню белгилене. Шо эсделик гюнню барышында гьар тюрлю давларда ва тюртюшювлерде ортакъчылыкъ этген якълавчуланы къоччакълыкъларын эсге ала. Олай да, шо гюн ярыкъ ва насипли гележек учун къурбан болгъанланы эсгере.
Шоллукъда, 15-нчи февральда, оьтген талатгюн, Къарабудагъгент юртну Уллубий Буйнакскийни атындагъы ял алагъан пачалыкъ бавунда воин-интернационалистни гюнюне багъышлангъан «Жанлы эсделик» деген баш булан чара оьтгерилди.
Чараны барышында Къарабудагъгент районну гьакимбашы Магьмут Амиралиев, район Жыйыныны депутатларыны ёлбашчысы Адил Салаватов, район администрациясыны башчысыны орунбасары Жалалутдин Жамалутдинов, район администрацияны жаваплы къуллукъчулары, олай да школаланы муаллимлери ва охувчулары, маданият ожакъланы ва китапханаланы къуллукъчулары оьзлени ортакъчылыгъын болдурдулар.
Озокъда, чараны барышында гьюрметли къонакълар гьисапда афгъан ва оьзге дав агьвалатланы ортакъчылары да чакъырылгъан эди.
Чараны башында ону ортакъчылары инг башлап Уллу Ватан давда къалгъан районлуланы, сонг оьзлени борчларын кютювде къурбан болгъан полицияны къуллукъчуларыны, олай да афгъан давну къурбанларына салынгъан эсделиклеге жанлы гюллер салдылар.
Эсделик чараны барышында, жанлы гюллер салгъан сонг, районну башчысы Магьмут Амиралиев сёйледи.
- Бизин элибизни воин-интернационалистлери оьзлер гьар заман эркинликни ва ихтиярланы якълайгъанын бирдагъы керен аян этди. Олай да, бизин якълавчуларыбыз не заманда да бютюн дюньяны уьстюнде парахатлыкъны ва дослукъну якълагъан ва болдургъан.
Россияны ва республиканы ёлбашчылары йимик, бизин районну администрациясы да сизин гьаман якълажакъгъа сёз беремен. Олай да, сизин къоччакълыгъыгъыз оьсюп гелеген наслу учун уллу уьлгю, — деп айтды М.Амиралиев оьзюню сёзюнде.
Оьтгерилген чараны барышында воин-интернационалистлени атындан афгъан агьвалатланы ортакъчысы Жамал Ильясов сёйледи ва шонда болгъан давну къыйынлыкъларыны гьакъында бир гесек хабарлады. Школаланы охувчулары кёп къайгъы гелтирген афгъан давгъа багъышлангъан шаирлени шиъруларын гёнгюнден охудулар.
Чараны барышында район администрацияны социал ва яшёрюмлени ишлерине къарайгъан бёлюкню ёлбашчысы Гюлжанат Темирова да оьзюню сёйлевюнде бизин воин-интернационалистлерибиз ва якълавчуларыбыз къоччакълыкъны ва игитликни уьлгюсю болгъанын ачыкълашдырды.
Чараны ахырында ону ортакъчылары эсделик учун суратлар чыгъардылар.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
