«Ярыкъ береген юлдуз»
Январ айны 31-нде Дёргели юрт китапханада, Ана тилни айлыгъына багъышланып «Ярыкъ береген юлдуз» деген чара оьтгерилди. Чара къумукъ шаир Узлипат Ибрагьимованы яратывчулугъуна багъышланып юрюлдю.
Чараны ачгъан ва юрютген Дёргели юрт китапхананы ёлбашчысы Айшат Изиева сёзюн булай башлады:
- Адамлагъа биревню танытмагъа сюйсенг, ону атын, юртун, касбусун эсгерме тюше. Узлипат Ибрагьимованы буса, атын эшитгендокъ, бары да халкъ таный десек де ярай. Демек, районну халкъыны арасында ону танымайгъан, билмейген адам кёп аз бардыр.
Шаир, журналист У.Ибрагьимованы китапларын райондан оьтюп тышда да кёп сююп охуй. «Яшлыкъны сеси», «Мени гюллерим», «Сёнмейген от», «Шамчыракъ», «Гьасиретмен яшавгъа» деген ва башгъа китапларындагъы асарлар охувчуну юрегинде гёрмекли ерни тутгъан. 1998-нчи йыл чыкъгъан «Маккагъа сапар» деген китабын чы адамлар айрыча кёп сююп къаршылады.
Шо китапны ол язывчуланы арасында биринчи болуп, Маккагъа барып 4 керен гьажикъатын болуп гелгенде язгъан …, — дей ол.
Сонг сёз берилген Дёргели 2 номерли школаны муаллими Марипат Насухова Узлипат Ибрагьимованы шиърусун гёнгюнден охуду. Ол оьзюню сёзюн У.Ибрагьимованы яратывчулугъу гьакъдагъы хабар булан узатды.
Юрт китапхананы актив охувчусу Х.Муталимова шаирни «Гиймегиз, къаралар гиймегиз» деген шиърусун охуду. Сонг сёз берилген охувчулар М.Ягьияева ва К.Магьамматова У.Ибрагьимованы «Яшлыгъым» деген шиърусун гёнгюнден охудулар.
Чара йырав Хадижат Ибрагьимованы «Чачмалардай гёзлеринг» деген У.Ибрагьимованы сёзлерине гёре къурулгъан йыры булан тамамланды.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
