Кочапланы муаллими

Мен сизге ювукъдан таныш этмеге сюеген, кочапланыда кочабы, Болат Гьажиев 1981-нчи йылда Къарабу­дагъгент юртда тувгъан. Шо юртдагъы 2 номерли орта школада охугъан. Къарабудагъгент школаны 6-нчы класына юрюйген вакътисинден башлап, ол оьзюню тенглилери йимик, спортну гьар тюрлю журалары булан машгъул болмагъа башлагъан (тутушуп ябушув, дзюдо ва башгъалары булан). 1994-нчю йылларда Болат охуп турагъан 2 номерли орта школада охувчуланы арасында ябушувдан район ярышлары юрюле. Шо ярышлагъа къарамакъ учун баргъан Болат Гьажиевни, шо вакътиги спорт школаны директору (мисгин) Казим Жалилов, ярышланы юрюшюне къарап турагъан Болатны, гьазирлиги де ёкъ кююнде ярышларда ортакъчылыкъ этмек учун ортагъа чыгъара. Болат Гьажиевни шо гюнгю ябушуву ону 2-нчи ерге ес эте. Шо 2-нчи ерге рази болмагъан Болат, шо ярышланы артындагъы гюнюнден башлап, оьзюню бар гьюнерин спортгъа багъышлап, гечеси, гюню булан оьзюню бажарывлулугъун артдырма чалыша. Шолай гьаракат этивюню натижасында ол 1995-нчи йылда охувчуланы арасында оьтгерилген район ярышларда гёнгюллю кюйде ортакъчылыкъ эте ва районда 1-нчи ерни ала. Шондан берли арадан хыйлы йыллар оьтген. Шо йылланы ичинде Болат Гьажиев школаны да яхшы натижалар булан битдирип, ДГПУ-ну прикладной физкультура факультетин де тамамлап, оьр билимли касбучу (муаллим) болгъан. Болат Гьажиев университетде охуйгъан вакътисинде де бир де спортдан айрылмагъан. Шагьардагъы спорт школагъа, клублагъа юрюп, бажарывлу, аты айтылгъан тренерлени уьйретивлеринден толу кюйде пайдаланып, ябушувну къайдаларын, яшыртгъын сырларын уьйренип юрюген. Шо саялы болма ярай, Болат Гьажиев артдагъы йыллар оьзю кёп сююп сайлагъан спортну ушу-саньда къайдасындан, къайда ярышлагъа барса да, утуп, алдынлыкъны къазанып, къайтагъаны да кёп йыллар бола. Оьзюню эсинде къалгъан ярышланы эсгере туруп, Болат Гьажиев 1996-нчы йылда оьтге­рилген «Молодой дракон» деген ­хал­къара­ турнирни, онда оьзю 2-нчи ерни алгъанын, артындагъы 1997-нчи йыл Моск­вада оьтгерилген ярышларда, гене къайтып, 1-нчи ерге ес болгъанын оьктем кюйде эсгере. Озокъда, Болат Гьажиевни оьзюню уьстюнлюклери булан оьктем болмагъа толу ихтияры да бар.

Неге тюгюл де, ол ушу-саньда ярышларда Дагъыстанны 5 керен, Россияны 4 керен, дюнья ярышларында 2 керен биринчиликни къазангъан. Болат Гьажиев оьзюню спортгъа бакъгъан якъдагъы бажарывлулугъун, сюювюн юртлу яшёрюмлеге уьйретип юрюйгени де 21 йыллар бола. Айтагъаным, ол оьр охув ожакъда охуйгъан арт йылларындан башлап юртдагъы спортшколада тренер касбуну да юрютме башлагъан. Ону алдында ушу-саньда ябушувгъа уьйренип юрюйген юртлу яшланы арасында Дагъыстанны, Россияны, Европаны, гьатта дюньяны чемпионлары болгъанлары да бар.

Муна, гьали-гьалилерде, демек, январ айны ахырынчы гюнлеринде Каспийск шагьарда ушу-саньда ябушувдан яшёрюмлени арасында оьтгерилген Дагъыстанны чемпионатында Къарабудагъгент ДЮСШ-де тренер Болат Гьажиевни алдында ябушувланы къайдаларына уьйренип юрюйген кочапланы бир нечелери де ортакъчылыкъ этгенлер. Шоланы арасындан 56 кило авурлукъда ябушгъан Гебек Гебеков, 60 кило авурлукъда ябушгъан Жанболат Гьажиев, 60 кило авурлукъда ябушгъан Умалат Гьажиев 1-нчи ерлени алгъанлар. 56 кило авурлукъда ябушгъан Умалат Гьажиев буса шо ярышларда 3-нчю ерге ес болгъан. Дагъыстан ярышланы алдынлылары болуп къайтгъан кочапларыбызны ва оланы уьйретип юрюйген тренери Болат Гьажиевни етишген гезикли уьстюнлюклери булан биз де къутлайбыз.

Болат Гьажиев йимик, оьз ишине берилген ва яшёрюмлени савлугъу учун ябушмагъа уьйретеген тренерлени ва муаллимлени атларын биз уллу гьюрмет булан айтабыз.