Игитни аты унутулмай

Неге тюгюл де, ол оьзюню ата юртунда иш гёреген ич ишлер бёлюгюню ёлбашчысы гьисапда юртлуларыны аманлыгъын къорувда, оланы ихтиярларын якълавда узакъ йылланы узагъында тапшурулгъан борчларын намуслу кюйде кютюп тургъан.1999-нчу йылны гюз айларында Губденни ва ону айланасындагъы юртлагъа яйылгъан жинаятчы уьюрлеге къаршы турувда ол оьзюню арт тынышына етгинчеге халкъын якъламагъа берген антына амин кююнде къалгъан. Оьз халкъыны душманларыныны къолундан къурбан болуп гетсе де, ол гёрсетген къоччакълыкъ бугюнлерде де унутулмай. Торайып гелеген яш наслуну вакиллерине ол гёрсетген тенги ёкъ къоччакълыкъны гьакъында айтып етишдирмекни де къасты да этиле.

Ачыкълашдырып айтгъанда, Къарабудагъгент районнну билим берив ожакъларыны оьр класларында охуйгъан яшлагъа ону яшав тархларын ачыкъ этеген видеофильм гёрсетилип тура. Вагьшилик муратлагъа байланып иш гёреген жинаятчы уьюрлеге къуршалгъанланы сюлчелердей къаркъарасына батгъан гюллелеринден яшавдан тоймайлы гёзюн юмгъан Россияны Игити Абдулмалик Магьамматовну гьакъындагъы шо видеофильм «Районнну яшаву» деген газетини баш редактору Асадулла Гьажиевни яратывчулукъ гьаракаты булан гьазирленген. Душман булангъы явларда артда турмай, ал сыдыралагъа чыгъып, элин якълавда эренлердей эл намусун кютген игитни гьакъындагъы шо видеофильм оьтген итнигюн, ноябр айны 28-нде, Къарабудагъгентдеги бир номерли орта школаны охувчуларына да гёрсетилди. Бир де къопдурувсуз айтгъанда, охувчу яшлар шондан сонг ­оьзлер тувуп оьсген ватанын, ата юртун нечик сюйме тарыкъгъа гене де тюшюндюлер. Яшлар булан шо видеофильмге къарагъан эсгерилген охув ожакъны муаллимлери, олай да Къарабудагъгент районну ич ишлер бёлюгюню гьакъылбалыкъ болмагъан яшланы ишлерине къарайгъан инспекторлары С. Муттагьирова ва М. Алиева шу меселде игитни атын даимлешдирмек учун гьайлы янашгъаны саялы А. Гьажиевге оьзлени разилигин билдирди.

Шо гьакъда айта туруп, школаны тарбиялав ишлеге къарайгъан завучу Райсанат Гьажиева, олай да буссагьатгъы вакътиде оьр класларда ОБЖ дарсланы муаллими гьисапда чалышагъан Имамутдин Жалилов оьтгерилеген гьаракатны къурумлу юртмек учун айрыча къаст этгенин айрыча айтмагъа тюше. Булай да олар кёп йылланы узагъында топлангъан сынавуна таянып, алдында билим алагъан яшлар терен ва мукъаятлы билимлер алгъандан къайры, муратгъа къыйышывлу тарбияланып тарайсын учун да мекенли иш юрюте. Къарабудагъгентдеги бир номерли орта школада бугюнлерде олар билим берив ожакъланы алдына салынгъан борчланы яшавгъа чыгъармакъ учун ёрукълу кюйде жагьчылыкъ гёрсетегени де шогъар шагьатлыкъ эте.

Яшёрюмлени экстремизмни ва террорчулукъну алдын алывну айланасында юрюлеген англатыв гьаракат гьисапда оьтгерилген шо видеофильмни гёрсетив ювукъ вакътини ичинде бизин районну оьзге билим берив ожакъларында да оьтгерилежек.