«Ислам динни кюрчюлери»

Олимпиаданы оьтгермеге сиптечи гьисапда Къарабудагъгент юртну жагьиллери ва район администрацияны билим берив управлениеси оьзлени бойнуна алгъан эди. Олимпиаданы аслу мурады охувчуланы арасында «Ислам динни (культураны) кюрчюлери» деген предметни мекенли уьйретмек, яшланы пагьмуларын аян этмек ва ата-аналаны шо ишге къуршамакъ эди.

Олимпиаданы ачылывунда ону ортакъчыларына ва муаллимлерине район жыйыныны депутатларыны ёлбашчысы, Къарабудагъгент гимназияны директору Адил Салаватов ва Къарабудагъгент юртну имамы Халитгьажи Бабатов къутлав сёзлер булан сёйледилер.

Оланы сёйлевлеринден сонг, олимпиаданы ортакъчылары динге, билимге, дослукъгъа, тазалыкъгъа, рагь­мулукъгъа, агьлюге багъышлангъан шиъруланы гёнгюнден охудулар.

Олай да, олимпиаданы ортакъчыларына школада олар оьзлер охуйгъан «Ислам динни (культураны) кюрчюлери» деген предметге гёре соравлар ва тапшурувлар гьазирленген эди.

Олимпиаданы гьюрметли жюриси алдынлы ерлени шулай тасдыкъ этдилер. Уланъяшланы арасында Къарабудагъгент гимназияны 4-нчю класыны охувчусу Ильяс Мамедов (муаллими Айида Ягьияева) 1-нчи ерге ес болду. Къарабудагъгент 3 номерли орта школаны 4-нчю класыны охувчусу Рамазан Сулейманов (муаллими Зумурут Пашаева) 2-нчи ерни къазанды. 3-нчю ерни буса Къарабудагъгент 2 номерли орта школаны 4-нчю класыны охувчусу Амирхан Сунгуров (муаллими Хадижат Къурбанова) къазанды.

Къызъяшланы арасында Къарабудагъгент гимназияны 4-нчю класыны охувчусу Динара Гьажиева (муаллими Айида Ягьияева) 1-нчи ерге ес болду. Къарабудагъгент 3 номерли орта школаны 4-нчю класыны охувчусу Зайира Абдулкъапурова (муаллими Зумурут Пашаева) 2-нчи ерни алмагъа бажарды. Къарабудагъгент 2 номерли орта школаны 4-нчю класыны охувчусу Милана Гьажиева (муаллими Хадижат Къурбанова) 3-нчю ерге ес болду.

Олимпиаданы онгаргъан ва къыйматлагъан жюрини ёлбашчысы – районну билим берив управлениесини алдынлы касбучусу Осман Ражапов охувчуланы олимпиадагъа оьр даражада гьазир болгъанлыгъын ачыкълашдырды. Олай да, ол олимпиаданы оьтгермеге кёмеклешген, яшлагъа савгъатлар берген рагьмулу юрекли ва чомарт къоллу юртлуларына гьакъ юрекден баракалласын билдирди.

Олимпиадада алдынлы ерлени къазангъан охувчулагъа ва оланы гьазирлеген муаллимлеге грамоталар ва баракалла кагъызлар тапшурулду.