Конкурс оьтгерилди

Бу йыл шо конкурсда районну 4 муаллими ортакъчылкъ этди. Конкурсну ортакъчылары барысы да алдына салынгъан масъалаланы уьстюнлю кюйде чечме бажардылар. Жюрини ортакъчылары башында метод бёлюкню ёлбашчысы Р.Умаева булан конкурсантлагъа багьа берди. Жюрини гьасиллерине гёре алдынлы 1-нчи ерге Гьели орта школаны математика дарсланы муаллими Рупият Къадырова ес болду.

Ол Къарабудагъгент райондан «Учитель года – 2022» деген Бютюнроссия конкурсну республика этабында ортакъчылыкъ этежек.

2-нчи ерге Паравул 3 номерли орта школаны муаллими Аминат Атаева ва Къарабудагъгент гимназияны муаллими Найида Пашаева ес болдулар.

3-нчю ерни Къарабудагъгент 3 номерли орта школаны муаллими Умукусум Гьасанова алды.

Гьали мен «Учитель года – 2022» деген Бютюнроссия конкурсну район этабыны алдынлысы Къадырова Рупият Магьамматовнаны гьакъында айрыча айтмагъа сюемен.

Р.Къадырова Гьели орта школада математика дарсланы юрютегени 17 йыл бола. Ол школада охуйгъандан берли мекенли илмуланы кёп сюе болгъан. Демек, математика, физика, информатика дарсланы кёп сюеген Р.Къадырова школаны битгенде ДГПУ-ну математика факультетине охумагъа тюшген. Эсгерилген предметлени сюймек учун огъар оьзю ­оьтесиз кёп сюеген муаллими Нурият Элдаровна таъсир этген.

Рупият Къадырова 3-нчю курсну битгенде, заочно охувун узата туруп, школада муаллим болуп ишлемеге башлагъан. Демек, оьзю кёп сюеген ишни башын тутгъан. Шону булан бирче оьзюню билимлерин артдырмакъны уьстюнде де чалышгъан. Ол ДИРО ва МЦПК-де билимлерин камиллешдирген. Олай да, Р.Къадырова «Точка роста» кванториумну 2021-нчи йылны форумунда ортакъчылыкъ этген. Ол янгы технологияланы оьзюню ишинде уьстюнлю коллайгъанындан къайры да, иш ёлдашларына шо ишде бажарывлу кёмегин болдура.

«Учитель года – 2022» деген Бютюнроссия конкурсну район этабында Р.Къадырова къатты кюйде 1-нчи ерге ес болгъаны бизин бек сююндюрдю. Ону охувчулары да район оьлчевде оьтгерилеген олимпиадаларда алдынлы ерлени алып юрюй. Масала, А.Асадуллаева, «Мы дружбой сильны» деген конкурсда ортакъчылкъ этип, 2-нчи ерни алгъан.

Р.Къадырова – яратывчу педагог. Ону дарслары къужурлу ва тюшюнюв процесде оьте, тюрлю дидактика ва аянлыкъ материаллар къоллав булан юрюле.

Р.Къадырова охувчулагъа предметни тюз, мекенли, билимли къайдада англатма ва етишдирме бажара. Охувчуланы ол билим алыв процесге актив кюйде къуршама бажарагъан муаллим, (шогъар гёре охувчуларындан къайтарышын да ала. Ону охувчусу М.Акаев ДГПУ-ни 4-нчю курсунда охуй, къызы да анасыны ёлун узата.

Биз Рупият Къадырованы етишген уьстюнлюгю булан къутлай туруп, ортакъчылыкъ этежек Бютюнроссия конкурсну республика этабында да алдынлы ерге ес болмакъны ёрайбыз. Биз огъар гележекде савлукъ, ишинде уьстюнлюклер ёрайбыз!