Мол тюшюм учун ябушув юрюле
Июль ай – районну юрт хозяйство тармагъында лап асувлу тармакъланы бириси юзюмчюлюк тармакъны къуллукъчулары учун инг къыставлу вакътиси. Ерлерде мол тюшюм учун гьаракат эте туруп, борланы гезикли къуллукълары кютюле. Айтма тарыкъ, артдагъы йылларда районда сыйлы мердешлер инамлы кюйде узатыла. Юзюмчюлюк тармакъ –бырынгъы заманлардан берли районну экономикасына аслам къошум этеген тармакъланы бири. Юзюм болдурувда ва ону пачалыкъгъа тапшурувда районубузну юзюмчюлерини, механизаторларыны, оьзге касбучуларыны уьстюнлюклери гьар чараларда макъталып юрюйген йыллар да бар эди. Ону бизин эсли наслубуз буссагьатда да эсден тайдырып болмай.
Ёкъ деген даражагъа етген юзюмчюлюк тармакъны аякъгъа тургъузмакъ учун артдагъы йылларда хыйлы гьаракат, къурумчулукъ иш гёрюлдю. Гьакъыкъатда, районда юзюмчюлюк тармакъ аякъгъа тура гелегенине юрек къуванмай болмай. Районда йылдан-йыл юзюмлюклени майданлары генглеше, алынагъан тюшюмлени къадары арта.
Муна, буссагьатгъы вакътиде районда янгыз артдагъы йылларда орнатылгъан юзюм бавланы майданлары 2 минг гектардан да къолай топуракъланы елеген.
Бугюнлерде ерлерде юзюмню мол тюшюмю учун ябушув юрюле. Демек, юзюмчюлер, механизаторлар, йылны бу заманында борлагъа этилме тарыкълы къуллукъланы агротехника гёрсетеген болжалларда къурумлу кюйде давам этип туралар.
Ерлерде юзюм бавланы сугъарыв, чёп отланы, чинкдеси, тюшюмню аврувлардан, зиянлы жанлардан къорув ишлер къурумлу кюйде узатыла. Ондан къайры да, юзюмчюлерибиз борланы яшыл байлавун, къолтукъларын тайдырыв (обломка) ишлени давам этип туралар.
Юзюмчюлер юзюмлюклени экинчи керен сугъарма башлагъан.
Ерлерде аврувланы, зиянлы жанланы алдын алмакъ муратда борлагъа 3-нчю керен дарман урув ишлер узатыла.
Борлагъа къуллукъ этивде, мол тюшюм учун юрюлеген гьаракатда Къарабудагъгент юрт муниципал къурулувну топуракъларында иш гёреген Агро фирма Герейтюзню, СПК «Далап», Дагнефтепродукт ОАО, КФХ «Шанс» ва оьзге юрт хозяйство предприятиелени юзюмчюлерини, механизаторларыны гьаракаты гючлю.
Борланы гьар-бир къуллукъларын заманында сан янлы кютюв гьаракатда «Къурбуки» КФХ-ны юзюмчюлери яхшы гьаракат этип ишлейлер.
Бир тюрлю авурлукълагъа да (сув) къарамайлы, артдагъы йылларда Уллубийавул юрт муниципал къурулувда юзюмчюлюк тармакъны майданларын генглешдиривде, янгы участкалагъа борла орнатыв ишлер яхшы салынгъанын эсгерме тюше.
Бойнакъда алда хозяйствону юзюмчюлюк тармагъында намуслу кюйде ишлейген бай сынаву булангъы ишчилер, механизаторлар аз тюгюл эди. Гьалиги наслу да сыйлы мердешлени давам эте туруп, юзюм болдурувда, борлагъа къуллукъ этивде яхшы натижаланы къолда эте гелеген фермерлер бар.
Буссагьатгъы вакътиде районну юзюмчюлери юзюмлюклени сыдраларын 3-4 керен культивация этген, 500 гектардан къолай юзюмлюклени боюна чёп отлагъа къаршы гербецит урулгъан. Этилген къуллукълагъа гёре районну юзюм плантацияларында юзюмню тюшюмю яман гёрюнмей. Юзюмчюлерибизге бугюнлерде юзюмню къабул этеген, ишлетеген къурумлар килосун нечакъыдан алар экен деген сорав рагьатлыкъ бермей.
Агъулу дарманланы, борлагъа этилеген къуллукъланы багьалары шайлы гётерилгенде, юзюмню заводлар къабул этеген багьасы алдагъы кюйде къалса, дурус болмас.
Борлагъа къуллукъ этив, тюшюмню аврувлардан къорув ишлени барышына топуракъда айрыча доланагъан ёлдашлар айрыча гьаракатчылыкъ гёрсете.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
