Гьукуматны ягъындан кёмек болдурулажакъ

Сюрлюгюв болгъан ерге Къарабудагъгент районну башчысы Магьмут Амиралиев, Россияны ДР-деги ГУ МЧС-ни ёлбашчысыны орунбасары Олег Халилов, ДР-ни ОНФ-ни исполкомуну бёлюгюню председатели Жамалутдин Шигьабутдинов ва сопредседатели Елена Павлюченко да баргъанлар.

Инспекция тергевлени гьасиллерине гёре, сюрлюгювню натижасында адамлар яшавлукъ этеген 9 уьй бузулгъан, шоланы 4-сюнде яшамагъа ярамайгъаны мекенлешдирилген. МЧС-ни Баш Управлениесини касбучулары къалгъан 5 уьйню онгарма бажарылагъанын яда бажарылмайгъанын белгили этмек муратда тындырыкълы тергевлер этип тура.

Газетибизни гетген номеринде де эсгергенибиз йимик, уьйлери бузулгъан 45 адам бизин районну «Леззет» санаторийинде ерлешдирилген.

Зараллангъан уьйлеге тергевюн болдургъан сонг, вице-премьер А.Карибов «Леззет» санаторийге баргъан ва бузулгъан уьйлени есилери булан ёлукъгъан, санаторийде оланы яшавлукъ шартларына къарагъан.

Гёчюрюлме тюшген адамлар вице-премьерге яшлары тезликде школагъа баргъанны, охувлардан айрылмагъанны сюегенин англатгъан, олай да ишге барагъанлары учун бар четимликлени эсгерген. Шогъар гёре, А.Карибов олагъа тезликде заманлыкъгъа яшавлукъ этмек учун дыгъар да этип, шагьаргъа ювукъда уьйлер гёрсетилме гереги гьакъда айтгъан.

«Биз ватандашланы къыйын ва авур гьал тюшгенде кёмексиз къоймажакъбыз, болагъан кёмегибизни этежекбиз, олай да, яшавлукъ уьйлер булан да таъмин этербиз. Алда яшавлукъ этген ерлеринде олагъа дагъы яшама бажарылмай, яшаву учун къоркъунчлукъ тувулуна. Адамлар оьзлер уьйлер ишлеген ерде энниден сонг да табиатны тюрлю хатабалагьлары такрарланма балагъанны, яшамагъа къоркъунчлу экенни билме герек», — деген вице-премьер ва жаваплы адамлагъа гёчюрюлгенлеге болагъан кёмекни этмеге таклиф этген.