Сугъарса, яхшы болур

Уьлкебизни кёбюсю регионларын къалын къар, къатты сувукълар елеген буса да, бизин якъларда къышны биринчи айы нечакъы бола буса да йымышакъ, районну гьайванчылыкъ тармагъыны къуллукъчулары учун онгайлы бара. Гьайванлар, мал сиривлер сав гюнлер булан отлавлукъларда отлайлар. Уьстевюне авлакъларда гьайван-малгъа тойгъунча ашама эсги булан яшыл да бар.

Къыш айлардан тутуп янгы йылны тюшюмюню гьайын этме башласа, яхшы болур. Юзюм, емиш бавларда йылны бу заманында этме ишлер табыла.

Гюзде яхшы дагьнилер болду, ону яшырып болмайбыз. Тек, нечакъы дагьнилер болса да, къабудан, баш­дан эшеген еллер топуракъны уьст къатлавларындагъы дагьнисин алгъан.

Бугюнлерде юзюм, емиш бавланы сыдра араларын сюрме бола.

Топуракъда дагьни бар деп юзюмлюклерин сугъарма айланмайгъанлар, сонг гьёкюнер деп ойлашабыз. Бар халкъ участкаларын язбашда сугъарма къойса, шо заман ишде къыставлулукъ тувулунар.

Гьали КОР-да сув бар. Амма ерлерде сугъарыв ишлер къурумлу юрюле деп айтма къыйын. Юрт муниципал къурулувланы балансындагъы сув татавулланы гьалы да макътардай тюгюл. Къамуш оьсген, лай басгъан участкалар кёп. Шолай гьалдагъы татавуллагъа бакъдырылгъан сув, ёл бойларда кёп тас болувлагъа тарый. Ишлени ансат вакътисинде топуракъ гесеклени есилери харжлар жыйып ич хозяй­ство татавулланы тазаламакъны чарасы гёрюлсе, яхшы болур эди.

Чакъны гьар ачыкъ гюнюн мол тюшюм учунгъу гьаракатгъа бакъдырып ишлеген юртлу загьматчы гьёкюнмес.

Бугюнлерде участкаланы ерли, минерал кюйлевючлер берип азыкъ­ландырыв, сыдра араларын сюрюв, сугъарыв ва оьзге къуллукълар – болажакъ тюшюмге кюрчю салывда биринчи абат.