Байрамланы къалмагъалсыз оьтгерме чаралар гёрюле

Чараны гиришив сёз булан районну башчысыны 1-нчи орунбасары Ибрагьим Абдулмежитов ачды. Ол оьзюню къысгъаракъ сёйлевюнде шо гюн къаралажакъ масъалаланы малим этди ва чараны юрютме районну башчысыны аманлыкъ болдурув ишлеге къарайгъан орунбасары М.Зугьумовгъа тапшурду.

М.Зугьумов оьзюню сёйлевюн ювукълашып гелеген Янгы йыл байрам гюнлерде районну территориясында, демек ерлерде жамият къоркъунчсузлугъун ва низамны болдурма тарыкълыгъы гьакъда ­айтды. Шо саялы генгешни ишинде эки масъаланы арагъа салып, ойлашып, тийишли гьасил чыгъарып иш гёрме англатды.

Шо гюн чарада къаралгъан биринчи масъала, «Къарабудагъгент район» муниципал районну территориясында Янгы йыл байрам гюнлерде ва каникулларда жамиятны къоркъунчсузлугъун, низамны болдурувда гёрюлеген чаралар арагъа салынып ойлашылды. М.Зугьумов шо гьакъда этилеген ишлени гьакъында маълумат берме, районну ич ишлер бёлюгюню вакили, ОНД-ни ёлбашчысы Ё.Гьамзатовну сагьнагъа чакъырды. Ол оьзюню сёзюн булай башлады:

- Янгы йыл байрам гюнлени, Рождество каникулланы гюнлеринде районну территориясында, школаларда, яшлар бавларында, юртларда жамият къоркъунчсузлугъун, низамны болдурмакъ учун полицияны къуллукъчулары гётерилген режимде ишлейлер. Шо муратгъа район полицияны 77 къуллукъчусу, тышдан 20 гюч къуллукъланы вакиллери кёмекге гелген. Бугюнлерде школаларда, яшлар бавларында оьтгерилеген шатлыкъ чараларда, утренниклерде низамны сакъламакъ учун полицияны къуллукъчулары дежурналыкъ этелер. Декабр айны 31-нден тутуп Гьамзатны атындагъы ял алагъан бавда къурулгъан ёлканы къоруп сакъламакъ, оьтгерилеген шатлы чараларда жамият низамны болдурмакъ муратда сав сутка полицияны наряды дежурналыкъ этежек. Районда янгы йыл байрам гюнлени, шатлы чараланы къоркъунчсуз оьтгермек учун полицияны район бёлюгюню янындан тийишли чаралар гёрюлген – деди Ё.Гьамзатов.

Чарада экинчи масъала гьисапда Янгы йылны байрам гюнлеринде районну ватандашларын, къурумланы, идараланы тайышывсуз кюйде электрик ярыкъ, газ булан таъмин этив масъалагъа да къаралды. Бу масъалалагъа байлавлу Къарабудагъгент РЭС-ни ёлбашчысы Залибек Гьарумов, ЭГС-ни ёлбашчысы Камилпаша Оздемиров ёлдашлар оьзлени къурумларында Янгы йыл байрам гюнлерде ватандашланы, районну къурумларын, идараларын ток, газ булан тайышывсуз кюйде таъмин этмек учун гёрюлеген чараланы, шо гюнлеге тизген иш планланы графигин малим этдилер.

ЭГС-ни ёлбашчысы К.Оздеми­ровну сёйлевюнден ачыкъ болгъаны йимик, чакъ шулай исси гетсе, адамлар, тепличниклер, газны етишмейгенлигин гьис этмежеклер. Районда 8-10 градус сувукълар болса, ерлерде газны масъласы болажагъын яшырмады.

Чараны ахырында районну территориясында Янгы йыл байрам гюн­лерде жамият къоркъунчсузлугъун, низамны болдурувда ватандашланы, къурумланы ток, газ булан таъмин этивде, оьзге къуллукъларын кютюв­де жаваплы ёлдашлар белгиленди ва олагъа тапшурувлар берилди.