Язылывгъа тергев

Генгешни ачгъан ва юрютген район администрацияны башчысыны биринчи орунбасары Ибрагьим Абдулмежитов, инг башлап, Къарабудагъгент юртда майнинг-фермаланы ачыкъ этмек муратда оьтгерилген рейд тергевлени гьакъында баянлыкълар берди. Шо баянлыкъланы барышында ихтияр якълав къурумланы къуллукъчулары да къуршалгъанын англатды.

Оьтгерилген генгешни барышында «Районну яшаву» газетни баш редактору Асадулла Гьажиев район газетге язылывну гьакъында маълуматлар берди. Ол оьзюню сёйлевюнде эсгерген кюйде, 2021-нчи йылны башында район газетни тиражы 2890 экземпляр эди. Йылны ортасында шо аз болгъанын ол ачыкъ этди. Демек, бугюн-буссагьат газетни тиражыны санаву 2515.

Олай да, «Районну яшаву» газетни ёлбашчысы газет оьзюню 70 йыллыкъ юбилейин белгилейгенин аян этди. Шоллукъда, шо юбилейге багъышланып, газетни бетлеринде редакцияда хыйлы йыллар редакторлар, редакторланы орунбасарлары, мухбирлер ва оьзге тюрлю къуллукъчулар болуп загьмат тёкгенлени гьакъында макъалалар ва очерклер язылып тургъанын айтды.

Сонг да, районну ичинден ­чыкъгъан белгили адамланы гьакъында да макъалалар берилип турагъанын ва район газетни мухбирлери оьзлени борчларын тийишли ва намуслу кютегенин ачыкълашдырды.

Ондан сонг трибунагъа гётерил­ген район администрацияны башчысыны орунбасары Жалалутдин Жамалутдинов 2022-нчи йылгъа газетге язылмакъны юртланы башчыларына ва олай да идараланы ва къурумланы ёлбашчыларына таклиф этди.

Генгешни барышында ону юрютген И.Абдулмежитов юртланы башчыларын гьар ерде бар законсуз чёп ташлайгъан хас къуюланы тайдырмагъа талап этген сонг, бирдагъы керен «Районну яшаву» газетни якъламагъа ва огъар язылмагъа чакъырды.