Дёргелили Алибек
Декабр айны 13-нде Дёргели юрт китапхананы ёлбашчысы А.Изиеваны сиптечилиги булан «Дёргелили Алибек» деген къоччакълыкъны сагьаты оьтгерилди.
Чара башлагъынча китапхананы актив охувчулары, муаллимлер, чакъырылгъан къонакълар Дёргели юрт китапхананы ёлбашчысы Айшат Изиева алдын ерли гьазирлеген дёргелили къоччакъланы дав ёлларына багъышлангъан китап ва сурат выставкагъа къарап чыкъдылар.
Юрт китапхананы актив охувчусу Х.Муталимова, Дёргели 1 номерли орта школаны педагоглары С.Салигьова, Н.Заирова деникинчилер булан юрюлген къагьрулу давланы гьакъында хабарлады. Шо йылларда Алибек, олай да башгъа дёргелилер гёрген къыйынлыкъланы эсге алды, оланы къоччакъ ишлерин гёзден гечирди. Шо къыйынлыкълагъа да къарамайлы, юртун ва элин якълагъан коччакъланы атына кёп макътавлу сёзлер айтды. Алибек йимик ватанына берилген, эли учун къанын-жанын аямайгъан адамлар болса, душмандан уьст гелме бажарылагъаны гьакъда олар маълуматлар ва мисаллар гелтире туруп хабарлады.
Деникинчилер Дёргели юртгъа гелгенде, юртлулагъа кёп зулму этген, юртну яллатгъан. Оьзюню сёйлевюнде А.Изиева дёргелили къоччакъ Алибек къолунда савуту да ёкъ кюйде душманлагъа къаршы ябушгъаны гьакъда айтды. Алибек, агъачлыкъда яшынып, хапарсыздан чыгъып-чыгъып деникинчилени оьлтюрюп тургъаны, хыйлы заман акъ къазакълар ону тутма болмай тургъаны гьакъда хабарлады.
-Алибек уллу къаркъаралы, бийик ва бек гючлю адам болгъан. Ол яшыртгъын янгыз гелеген акъ къазакълагъа чабып, оьзюню къатты юмуругъу булан бир керен уруп йыгъып къоя болгъан. Шолайлыкъда ол кёп душманны оьлтюрген. Деникинчилер сав юртну айланып «яшыртгъын ачыв алывчуну» излей болгъан. Ахырда итлер булан излеп, ону тапгъанда, гьатта итлер де ону ювугъуна бармагъа тартына болгъан. Душманлар ягъына гелгенде, олтуруп мичери ашап турагъан Алибек еринден де турмагъан. Акъ къазакълар бир болуп ону тутуп оьзлени ёлбашчысыны янына алып баргъан. Душманны ёлбашчысы огъар кёп соравлар берген. Тек ол бир соравгъа да жавап бермей тургъан. Алибек орус тилни англамай деп деникинчилер къумукъ офицерни алып гелип, ондан таба соравлар беривюн узатгъан. «Неге оьлтюрдюнг буланы?»-деген офицерни соравуна: Алибек: «Тез жагьаннемге тюшсюн деп оьлтюрдюм»,-деп жавап берген ва хантавлатын тебип душмангъа сатылгъан офицерни де йыкъгъан. Тек офицер тезликде йыгъылгъан еринден туруп, бугъар тапанча булан ургъан. Ону арты булан къалгъан къазакълар да Алибекге гюллелерин себелеген,-деп хабарлай А.Изиева.
Сонг охувчулар «Дергели» ва «Вай къазакълар яллатды» деген шиъруланы гёнгюнден охудулар.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
