Меню
16+

Сетевое издание "Району яшаву"  «Будни района»

12.11.2021 09:59 Пятница
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Уллу уьстюнлюк

Автор: Шихав Къайирбеков

Бизин район къайсы девюрде де юрт хозяйство продукталар болдурувда ва ону пачалыкъгъа сатып беривде районланы арасында юрюлеген загьмат гьаракатда ал сыдраларда болуп гелген. Шогъар бизин районгъа гьукуматны ёлбашчыларыны янындан берилген оьр савгъатлар, гёчювчю къызыл байракълар ва оьзгелери ачыкъ кюйде шагьат.

Демократия алмашынывлардан сонг да районубузну загьматчылары сыйлы мердешлени инамлы кюйде узаталар. Демек, юрт хозяйство продукталар болдурувну къадары, топуракъланы асувлу къоллав алдагъы заманларда йимик тюгюл буса да, гьалиги девюрде де юрт хозяйство продукталар болдурувда топуракъланы къоллавда алгъа багъып барыв ачыкъ.

Гьали-гьалилерде Дагъыстан республиканы башчысы Сергей Алимович Меликов шагьар округланы, мунциипал районланы асувлу ишлевюню гьасиллерине къарагъан ва алдынлыланы белгилемек деген Къараргъа къол салгъан. Тюзлюк бойда ерлешген районланы арасында, 2020-нчы йылны гьасиллерине гёре, бизин районгъа гьюрметли 3-нчю ер берилген.

Артдагъы йылларда районубузну бары да тармакъларында алгъа абат алына. Ерлерде ишлетилеген топуракъланы къадары, алынагъан гелимлер артып юрюй.

Муна, 2021-нчи йыл да тарихге гетме ай ярым къалгъан. Аслу авлакъ ишлер ансат болгъан. Бары да тармакъланы къуллукъчулары алгъа салынгъан тапшурувланы хыйлы артыкъ этип яшавгъа чыгъара гелелер.

Юзюмчюлюк тармакъ республиканы, районну бюджетине аслам къошумун болдура. Артдагъы 7-8 йылны ичинде районда юзюмлюклени майданлары хыйлы генглешген. Юзюмчюлени, механизаторланы, оьзге касбучуланы къайратлы загьматы булан участкаланы тюшюмлюгю гётерилип юрюй.

Гёрюлген къурумчулукъ ишлени натижасында буссагьатгъы вакътиге районда юзюм бавларыбызны умуми майданлары 2111 гектаргъа етишген. Шо участкаларыбызны 1508 гектары планлы кюйде тюшюм береген юзюмлюклер. Шону ичинде 200 гектардагъы юзюмлюклер бу йыл плангъа гирген.

Оьрде де эсгерип гелгенибиз йимик районда борлагъа къуллукъ этивде бай сынав топлагъан юзюмчюлер, касбучулар кёп. Олар борланы гьар-бир къуллукъларын агротехника гёрсетеген болжалларда сан янлы кюйде оьтгерип юрюйлер.

Муна, юзюм бавларда ишлер ансат болгъан. Участкаланы тюшюмю къайтарылып битген. Эсгерме герек, юзюмчюлюк тармакъда чалышагъан ёлдашланы йыл боюнда тёкген къайратлы загьматыны, гьаракатыны натижалары оьтесиз къуванчлы. Бу йыл юзюмчюлерибиз районубузну янгы тарихинде болмагъан натижаланы къолда этме бажаргъанлар.

Санавлар булан айтгъанда, районда 19883 тон гюнешни тюшюмю къайтарылгъан.

Артдагъы йылларда районда юзюмню сакълавгъа салывда да тийишли шартлар болдурула геле. Районну территориясында 3 минг тон юзюм, емишлени сакълавгъа салма шартлар яратылгъан. Амма сентябр айны ахыр гюнлеринде, октябр айны баш гюнлеринде эки-уьч гюнден узакъ явгъан янгурлар юзюмню сан янына бек зиян этди. Шону натижасында сакълавгъа гёз алгъа тутулгъанындан эсе аз салынды.

Юзюмчюлени бир зат сююндюре – бу йыл юзюмню ишлеген къурумлар да яхшы багьагъа ала эдилер. Бир сёз булан айтгъанда, юзюмге талап арта.

Районубуз юзюм болдурувда булай гёрмекли натижаланы къолда этивде юрт хозяйство предприятиелени, сабанчы-фермер хозяйстволаны, топуракъда айрыча доланагъан ёлдашланы гьарисини аслам къошуму бар. Болса да, айры-айры юрт хозяйство предприятиелер масала, СПК «Далап», Агрофирма «Герей-тюз», ОАО «Дагнефтепродукт» оьзлер къуллукъ этеген юзюмлюклерини гьар гектарындан 194-210центнер тюшюм къайтарма бажаргъанлар. Сабанчы-фермер агьлюлер: КФХ «Шанс», КФХ «Юлдуз» ва оьзгелери гёрмекли натижалагъа етишген.

Юзюм болдурувда топуракъда айрыча доланагъан ёлдашланы къошуму да гёрмекли. Масала, М.Гьайдаров, Н.Салаватов, Гь.Мутдагьиров, И.Амиралиев, Гь.Мамаев ва оьзге ёлдашлар участ­каларыны гьар гектарындан 230-250 центнер тюшюм алгъанлар.

Бугюнлерде районну юзюмлюклеринде бавланы сыдыраларын сюрюв, тюеклени сыдыра араларын толумлашдырыв ишлер башлангъан.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4