Уьлгюлю муаллим
Муаллимлик касбу абурлу ва макътавгъа тийишли касбулардан санала. Муаллим касбугъа ес болмакъ учун яшлар булан къатнамагъа, сюймеге ва оланы къыйынын-дертин билмеге, демек бар якъдан пагьмулу адам болмагъа тарыкъ.
Шолай муаллимлени бириси деп Темирова Самия Магьамматкъасумовны гьакъында да айтмагъа тийишли.
Ол Къарабудагъгент Гимназияда ишлей. Бу йыл ол дёртюнчю класны юрюте.
Ата юртундагъы школаны яхшы къыйматлагъа тамамлагъан сонг, ол Дагъыстан пачалыкъ педагогика институтну башлапгъы класланы муаллимлерин гьазирлейген факультетине охумагъа тюше. 2003-нчю йыл С.Темирова ону уьстюнлю кюйде тамамлай. Шоллукъда, педагогика институтну битдирген гюнден башлап бугюнге ерли Самия Магьамматмакъсумовна Къарабудагъгент гимназияда гиччипавлагъа билим ва тарбия бермекни уьстюнде чалыша. Ол биринчи категориялы муаллим. Муаллимни аслу иши – яшлагъа билим ва тарбия бермек, олагъа бары да якъдан оьзю уьлгю болмакъ гьисаплана.
С.Темирова оьзюню шо борчуна намуслу кюйде янаша. Гьар гюнлюк ишинде ол тюрлю янгы къайдаланы къоллай, дарсларын къужурлу оьтгермекни, гиччипавланы тергевюн артдырмакъны гьаракатын эте.
Ону иш ёлбашчылары эсгереген кюйде, Самия Темирова оьзюню ишин мекенли билеген ва ишине яратывчу янашагъан муаллим. Ону охувчулары район олимпиадаларда, тюрлю конкурсларда ортакъчылыкъ эте ва алдынлы ерлеге ес бола.
Биз ону Муаллимни гюню булан къутлай туруп, гележекде уллу уьстюнлюклер ва кёп яхшылыкълар ёрайбыз.
Оьз мухбирибиз
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
