Имамлар булан ёлугъув

Оьтгерилген шо ёлугъувда районну ичинде коронавирус инфекция аврувну яйылывуну ва шону алдын алывуну, олай да халкъны вакцина этивню барышыны айланасында лакъыр болду.

Ёлугъувну башында районну башчысы М.Амиралиев оьзюню сёйлевюнде коронавирус аврувну яйылывуну ва вакцина этивню гьакъында баянлыкълар берди. Масала, бугюн-буссагьат Къарабудагъгент район больницада шо аврув булан 41 адам ятгъанын эсгерди. Вакцина этдирген адамланы санаву буса 7200-ден айлангъанын англатды.

Шо ёлугъувну барышында ортакъчылыгъын болдургъан Къарабудагъгент район больницаны баш врачы Расул Гьиравов вакцина этдиргенлер шо аврувдан кёп сийрек ва енгил авруйгъанын ташдыргъан сонг, эгер гьал шулай оьтсе, адамлагъа дарманлар ва оьзге медицина препаратлар етишмей къалмагъа болагъанын айтды.

Олай да, шо ёлугъувда районну гьакимбашы М.Амиралиев бир-бир идаралагъа ва къурумлагъа QR – код булан гирмеге ихтияры болажагъын аян этди. Демек, спорт заллар, чачын онгарагъан хас идаралар (салоны красоты, парикмахерская), ашханалар адамланы шолай гирмеге къояжакъ.

Районну башчысы эсгерген кюйде, эгер эпидемия гьал гюн сайын бузукъ болса, авруйгъанлагъа дарманлар, койка-ерлер, таза гьава (кислород) етишмежек. Шо саялы да, ол районну ичиндеги юртланы имамларына межитге гелеген адамланы санавун аз этмеге ва коронавирус аврувгъа къаршы вакцинаны этдиривню гьакъында мекенли кюйде баянлыкълар бермекни тиледи.

Оьзюню сёйлевюню ахырында районну гьакимбашы М.Амиралиев, аврув булангъы гьал яхшылашмаса, бир юртну, районну яда савлай республиканы ичинде дазулангъан чаралар гийирилмеге болажагъын ачыкълашдырды.