Гьаракатчы муаллим ва завуч
Муаллимни касбу байрам гюнюню алдында биз оьзюню гьакъында язмагъа арив гёреген муаллим ва завуч Мустафаева Зубайдат Абдулмежитовна Къарабудагъгент 5 номерли орта школада ишлей.
Ол оьр категориялы муаллим, эсгерилген школада директорну охув-тарбия ишлеге къарайгъан орунбасары. З.Мустафаева 1967-нчи йыл Къарабудагъгент юртда тувгъан. 1985-нчи йыл школаны битдирген сонг, ол Магьачкъаладагъы Дагъыстан пачалыкъ педагогика институтну физико-математика факультетине охумагъа тюшген. Оьр охув ожакъда охувун тамамлагъан сонг, 1990-нчы йылда Зубайдат Мустафаева Манас орта школада танглагъан касбусунда иш башлагъан. 1995-1998-нчи йылларда З.Мустафаева Къарабудагъгент гимназияда ишлеген. 1998-нчи йылдан бугюнге ерли ол Къарабудагъгент 5 номерли орта школада ишлей. 2003-нчю йыл ону гьаракатын эс этген школаны ёлбашчысы, З.Мустафаеваны оьзюню орунбасары этип белгилей.
Математика ва физика школада инг де къыйын предметлерден санала. Тек предметин кёп сюеген муаллим охувчулар да къыйын предметни яхшы англасын ва сюйсюн деп гьаракатын болдура. Муаллимни аслу иши – яшлагъа тарбия ва билим бермек, олагъа гьар заман ва бары да якъдан уьлгю болмакъ. Зубайдат Мустафаева оьзюню шо борчуна намуслу янаша. Ол билим беривню методикасын, тарбиялавну къайдаларын яхшы биле, муаллимлени ишине анализ этип, оланы ишге ругьландырма къаст эте.
Выпускниклени ЕГЭ-леге гьазирлевге жаваплы администратор гьисапда да ол охувчулар, клас ёлбашчылар, педагоглар ва ата-аналар булан ОГЭ ва ЕГЭ-леге гьазирленив ишде кёп иш эте.
Ишине берилген муаллим гьар охувчуну, педагогну хасиятын билме ва англама, огъар тюз янашма гьазир. Тек З.Мустафаева билгенлери булан токътама рази тюгюл. Ол гьар гюнлер булан ишинде къолламакъ муратда янгы къайдаланы излей, оьзюню билимлерин камиллешдирмекни уьстюнде чалыша. Ол оьзюню сынавун жагьил муаллимлеге гёрсетмеге, оланы уьйретмеге, олагъа кёмеклешмеге сюе. Район ва школа оьлчевде оьтгерилеген метод бирлешивлерини генгешлеринде чыгъып сёйлей, ачыкъ дарслар оьтгере.
Сынавлу муаллим гьар яшгъа, муаллимлеге, ата-аналагъа тюзевлю янаша. Яшлагъа билим ва тарбия беривде гёрсетген натижалары саялы, Зубайдат Мустафаева школаны, район билим берив управлениени, район администрацияны, ДР-ни билим берив ва илму министерлигини янындан кёп керенлер Гьюрметлев грамоталар, Баракалла кагъызлар булан савгъатлангъан.
Сююмлю муаллимни охувчуланы, коллективни ва ата-аналаны арасында абуру бар.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
