Яшлар ону къуванчы

Индина Атаеваны загьмат стажы -30 йыл.

Индина Атаева 1971-нчи йылда февраль айны 5-нде тувгъан. 1987-нчи йыл Къарабудагъгент 1 номерли школаны охуп битдирип, Гудермесдеги педагогика училищеге охума тюше ва уьстюнлю кюйде тамамлай.

И.Атаеваны биринчи загьмат ёллары 1990-нчы йылда Паравул юртда башлана. 1993-нчю йылда Индина Атаева Къарабудагъгент 3 номерли школада башлапгъы класланы муаллими болуп белгилене. Муаллимни касбусуна гиччиден берли юреги авагъан И.Атаева охувчу яшланы оьз яшлары йимик сюймеге ва оланы сюювюн къазанма бажара.

Гьар яшны бир тюрлю хасияты барын, оланы гьарисин къомузну къыллары йимик кюйлеп турмагъа тарыгъын англайгъан Индина ишге гиришген биринчи гюнлеринден башлап, охувчуланы охувгъа гьаваслыгъы артып, билим алма муштарлы этмек учун бары гючюн сала.

И.Атаева – билимли, оьр квалификациялы, гиччипавлар учун яратылгъан муаллим. Ону гьар дарсы къужурлу ва маъналы кюйде, охувчулагъа тынч ва рагьат англашылагъан тил булан юрюле.

Гиччипавлар оьзлени анасыдай гёреген муаллим И.Абдулгьудаевнаны дарсларын кёп сююп къаравуллай, огъар абур ва сый эте.

Сюювюн гиччипавлардан аямайгъан И.Атаева охувчулагъа йымышакъ ва исси янаша. Дарсда муаллим къоллайгъан тапшурув карточкалар, тестлер, оюнлар, викториналар, оьтгереген сынав ишлер охувчуланы логика оюн гючлендире.

Гьар дарсгъа тындырыкълы кюйде гьазирленеген И.Атаева дарсларында алдынлы техника алатланы къоллай. И.Атаеваны уьстюнде герти муаллимде болма тарыкълы хасиятлар бары да бар. Ол оьзю етишген уьстюнлюклер булан токътап къалмай, гьар тюрлю янгы-янгы къайдаланы къолламакъ учун гечесин-гюнюн бир этип чалыша.

Индина Атаева охувчулагъа билим беривде администрацияны ва билим берив управлениени атындан кёп керенлнр гьюрметлер грамоталагъа, абурлу атлагъа ес болгъан.

И.Атаева – оьз ишине бек талаплы, методика якъдан толу гьазирлиги ва яратывчу пагьмусу булангъы муаллим.

И.Атаеваны Муаллимлени гюню булан къутлай туруп, гележекде де гьакъ юрекден берилген ишинде оьрлюклеге етмекни ёрайбыз.