Къаршылыкъ билдирилди

Шоллукъда, оьтген арбагюн, 17-нчи апрелде, районну билим берив управлениесини жыйынлар оьтгерилеген залында районну Жамият Палатасыны «Дагъыстанны бирлиги: тарих ва гьалиги девюр» деген баш булан дёгерек стол оьтгерилди. Шо чарада район Жыйыныны депутатлары, районну Жамият Палатасыны ва тамазаларыны Советини уьюрлери ортакъчылыкъ этдилер. Дёгерек столну районну Жамият Палатасыны ёлбашчысы Магьамматсайит Гьабитов ачды ва юрютдю. Ол оьзюню гиришив сёзюнде «Эркин республика» газетде язылгъан макъалагъа гёре районну Жамият Палатасы дёгерек стол оьтгерегенин ва къарар къабул этмеге гереклигин айтды.

Оьтгерилген чарада аслу докладчы гьисапда район Жыйыныны депутаты, «Толеранс» деген НКО-ну ёлбашчысы, экономика илмуланы кандидаты, ДР-ни милли сиясат министерлигини Жамият Советини уьюрю Абсалутдин Мурзаев сёйледи.

Ол да газетде чыкъгъан макъаланы гьакъында оьзюню ойларын ва пикруларын айта туруп, макъаланы ичиндеги хыйлы гесеклени жыйылгъанлагъа аян этди.

Демек, журналист М.Мур­тазалиевни сёзлерине гёре, Къарабудагъгент ва Къурбуки юрт­ланы арасында 200 йылны узагъында эришивлюклер юрюлюп тура, шо юртланы арасында къалмагъаллар бар деп яза.

Олай да, Къурбукиде ачылагъан янгы азарханагъа янгыз къурбукилилер ишге къабул этилмеге тарыкъ деп эсгере. Сайки, шо азархана Къарабудагъгент район азархананы табилигинде болмакъгъа къаршы.

А.Мурзаев оьзюню докладында эсгерген кюйде, нечесе юз йылланы боюнда Къарабудагъгент ва Къурбуки юртлулар дослукъда яшай, оланы арасында татывлу агьлюлер къурулгъан ва бар. Олай да, тувулунгъан гьалгъа гёре пачалыкъны къурумлары, депутатлар алгъасавлу кюйде чаралар гёрмеге гереклигин ачыкъ этди. Демек, шолай итти масъалаланы гьалиден 20-30 йыллар алда чечмеге тарыкъ­ болгъанлыгъын айтды.

Оьзюню сёйлевюн тамамлай туруп, А.Мурзаев районну Жамият Палатасын шолай ялгъан макъалалагъа ва журналистлеге къаршылыкъ билдирмеге чакъырды.

Дёгерек столда оьзлени пикрулары ва таклиф­лери булан Къарабудагъгент 5 номерли орта школаны ёлбашчысы (18 йыл район газетни баш редактор болуп ишлеген) М.Канзитдинов, Къа­рабудагъ­гент ЦРБ-ни проф­­комуну ёлбашчысы И.Гьа­кимова, Къурбуки 2 номерли орта школаны ёлбашчысы М.Гьа­­сан­ханов, район Жамият Палатаны уьюрлери: Ж.Мирзаев, А.Асапов, И.Ибадуллаев сёйледилер. Олар да журналист оьзюню макъаласында халкъны арасында питне салагъанны ва шогъар оьзлер къаршылыкъ билдирегенин ташдырдылар.

Дёгерек столну ахырында районну Жамият Палатасыны ёлбашчы М.Гьабитов оьзюню ёлдашларыны пикруларын толу якълады. Шоллукъда, районну Жамият Палатасы газетдеги макъалагъа къаршылыкъ билдирдилер, тийишли къурумланы журналистни такъсыргъа тартмагъа чакъырды.