Алгъасавлу чаралар

Генгешни ачгъан ва юрютген районну башчысы Магьмут Амиралиев яйлыкъ вакътиде от тюшювню алдын алмакъ учун районну ичинде не йимик чаралар гёрюлегени гьакъда маълуматлар бермеге оьзюню орунбасары М.Зугьумовну трибунагъа чакъырды.

Трибунагъа гётерилген район администрацияны башчысыны орунбасары М.Зугьумов оьзюню сёйлевюнде районну администрациясы от тюшювню алдын алмакъ учун этеген ишлени ва чараланы гьакъында мекенли кюйде баянлыкълар берди. Демек, районну ичиндеги бары да къурумлар ва идаралар от тюшювню алдын алмакъ учун оьзлени тувра борчларын кютмеге гереклигин ташдырды.

Ондан сонг доклад булан сёйлеген Къарабудагъгент район ОНД-ни ёлбашчысы Р.Гьасанбеков эсгерилген масъалагъа гёре комплекс къайдада чаралар гёрюлегенин, масса маълумат къураллардан макъалалар берилегенин, юртланы имамлары насигьатлар юрютмеге тарыкълыгъын айта туруп, эгер от тюшсе, жаваплы ёлбашчылагъа пачалыкъны янындан уллу оьлчевлерде къодулар салынагъанын аян этди.

РФ-ни МЧС-ни Къарабудагъгент район бёлюгюню ёлбашчысы Адилханов оьзюню сёйлевюнде буссагьат райондагъы мактапларда ва яшлар бавларында бар 54 сув жыйылагъан ерни 26-сы бузукъ экенлигин айтды. Олай да, оьтген йылны ахырында шолай гьавузлагъа тергевюн болдургъанда, шоланы айланасы насдан ва чёп алагъожадан толгъанлыгъын аян этилгенин англатды.

Районну юрт хозяйство управлениесини ёлбашчысы Ш.Мустапаев ва орманлыкълагъа къарайгъан къурумну ёлбашчысы оьзлени сёйлевлеринде де от тюшювню алдын алмакъ учун ­оьзлер ёлбашчылыкъ этеген къурумланы шо гьакъдагъы борчларын эсгерди.

Къарабудагъгент ЦРБ-ни баш врачы Р.Гьиравов оьзюню сёйлевюнде къызамукъну (корь) яйылывуну гьакъында баянлыкълар булан сёйледи. Демек, 2018-нчи йылда республикабызда 99 адам къызамукъ аврув булан авругъан эди буса, 2019-нчу йылны ­янгыз биринчи кварталында 100 адам авругъан. Шоланы ичинден 9 адам – бизин районлу.

Олай да, бугюн-буссагьат 1587 адам къызамукъ аврувгъа къаршы этилеген прививканы этмеге къаршылыкъ билдирген (отказ этген). Шоланы Губден ва Къурбуки юртлардан гьарисисинден 500-ер, Къарабудагъгентден 100 адам къаршы­лыкъ этген.

Р.Гьиравов оьзюню сёйлевюнде газетден, телевидениеден, социал сетлерден таба шо гьакъда англатыв ва профилактика иш юрюлмеге тарыкълыгъын аян этди. Мактапланы ва яшлар бавланы ёлбашчыларына прививка этилмеген яшланы шо идаралагъа алмагъа ярамайгъанын англатды.

Оьтгерилген генгешде гётерилген масъалалагъа гёре оьзюню ойларын ва пикруларын айта туруп, районну башчысы М.Амиралиев таклифлер ва тапшурувлар берди. Демек, от тюшювню алдын алмакъ учун тийишли чаралар гёрмейген мактапланы ва яшлар бавланы ёлбашчыларын такъсыргъа тартмакъны буюргъан сонг, районну ичиндеги бары да идараланы ёлбашчыларына шо гьакъда англатыв иш юрютмеге тапшурду.

Югъагъан аврувлагъа этилеген прививкаланы гьакъында айта туруп, районну гьакимбашы юртланы башчыларына ва имамларына жамиятны арасында шо гьакъда англатыв юрютмеге таклиф этген сонг, мактапланы ва яшлар бавланы ёлбашчыларына ата-аналар булан жыйынлар оьтгермеге ва медицина къуллукъчулагъа масса маълумат къураллардан агитация юрютмекни тапшурду.