Игитни эсделигине ярыш
Бизин элибизни лап да сыйлы байрамында – Уллу Уьстюнлюкню гюнлеринде – кёп тюрлю шатлы чаралар ва мердешлер булан янаша спорт ярышлар ва оьзге чаралар да оьтгериле. Демек, Уллу Ватан давда къоччакълыкъ гёрсетген игитлерибизни эсделиклерине спорт ярышлар оьтгерилегени яхшы адатгъа айлангъан.
Шоллукъда, май айны 6-7-нде Уллубийавулда Уллу Ватан давну ортакъчысы, Макътавлукъ орденлени толу кавалери Абдурагьман Ширавовну эсделигине багъышланып, яшёрюмлени арасында тутушуп ябушувдан гезикли районара ярыш оьтгерилди. Шо ярыш оьтгерилегени 15 йылдан къолай бола.
Эки гюнню узагъында оьтгерилген ярышда 15-ден артыкъ командалардан жыйылгъан 250-ден къолай кочап оьзлени бажарывлулугъун, пагьмусун къаравчулагъа ачыкъ этди демеге ярай. Олай да, эсгерилген ярышда къардаш Беларус ва Уьзбекистан уьлкелени кочаплары оьзлени ортакъчылыгъын болдурду ва алдынлы ерлеге ес болмагъа бажарды.
Спортчулар 14 тюрлю авурлукъ категорияда халчаны уьстюнде гюч сынады. Оланы тутушувларына къарамакъ учун Уллубийавулну къарты да, яшы да гелген эди деп айтсакъ, башгъа къопдурув болмас.
Ярышны экинчи гюнюню ахырында алдынлы ерлени къазангъан кочапланы атлары белгили болду. Демек, 14 де тюрлю авурлукъ категориядан 1-нчи, 2-нчи ва 3-нчю ерлени къазангъан кочаплар белгили болду. Олай да, командалардан: Уллубийавул юрт – 1-нчи, Беларус – 2-нчи ва Гьели юрт 3-нчю ерлеге ес болдулар. Алдынлы ерлени алгъан спортчулагъа кубоклар, дипломлар ва акъча савгъатлар тапшурулду.
Ярышны оьтгермек учун рагьмулу къолу булан кёмеклешген Уллубийавул юртну гьакимбашыны борчларын кютеген Алихан Абдурагьмановгъа, Ширавовланы агьлюсюне, “Бойнакъ хазна” деген рагьмулу фондгъа, Солтанбек Жанболатовгъа, Рустам Алиевге ва Умар Умаровгъа кочапланы атындан баракалла билдирилди.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.