Республиканы прокурору бизин районда

Республиканы прокурору Виктор Исакович районну далапчылары булангъы ёлугъувунда уьлкени башын тутгъанлар орта ва увакъ далапчылыкъ булан доланагъан ёлдашланы ишлери алгъа барсын деп производство базасын генглешдирмек учун этилеген кёмеклени ва ­оьзге енгилликлени гьакъында маълумат берип сёйледи.

Ол оьзюню сейлевюнде республикада далапчылыкъ булан машгъул ёлдашлар генглешсин, оьссюн учун, оланы интереслерин якълап тергев этеген къурумланы янындан тарихге гетип барагъан йылда тергевлер бир къадар кемигенин, налогларын тёлевде де енгилликлер яратылгъанын ачыкълашдырды.

Ёлугъувда районну башчысы Магьмут Амиралиев оьр къонакъгъа районубуз социал-экономика оьсювде 2023-нчю йылда къолда етише гелеген уьстюнлюклени малим этди. Айрокъда районну гьакимбашы артдагъы йылларда районну загьматчылары сурсат программаны яшавгъа чыгъарывда авлакъ ниъматлар – сют, эт болдурувда фермерлерибизни къолда эте гелеген уьстюнлюклерин санавлар булан исбат этип сёйледи.

Магьмут Амиралиевни сейлевюнде районда милли проектлер, программалар булан савлукъ сакълав, билим берив, маданият, спорт тармакъларда этил­ген ва этме гёз алгъа тутулгъан ишлени суратлады ва республиканы прокуроруна гёз алгъа тутулгъан планланы яшавгъа чыгъарывда оьзлени янындан болагъан кёмекни этме тиледи.

Сонг ёлугъув сорав — жавап къайдада оьтдю.

Районну юрт хозяйство предприятиелерини ёлбашчылары республиканы прокуроруна районда уллу муюзлю гьайванланы соягъан хас ер, емишлерден, юзюмден сок этеген завод къурма болушлукъ этеген масъалалагъа байлавлу соравлар берди.

Бизин районда ябыкъ топуракъда овошлар оьс­дюрюв чалт темплер булан оьсегенин гёз алгъа тутуп, прокуроргъа районгъа газ беривню къадарын артдырма кёмек этмекни тиледи. Прокуроргъа соравлар берген районну далапчылары газны масъаласы ёрукълу чечилсе, оьз харжлары булан дагъы да 800-900 гектарда теплицалар къурма гьазир далапчылар, топуракълар барын аян этдилер.

Дагъыстанны прокурору Виктор Эпп районну далапчылары гётерген масъалалагъа байлавлу мукъуятлы жаваплар берди ва республиканы прокуратурасы оьз­лени ихтиярларына гёре берген соравланы яшавгъа чыгъармакъ учун бары гьаракатын этежегин англатды.

Ёлугъувну тамамлай туруп, ДР-ни прокурору В.Эпп гьалиден бираз алда аэропортда болгъан къалмагъалны уьстюнде токътап сейледи ва районну, жамиятны, оьсюп гелеген яш наслуну арасында дослукъгъа, татыв­лукъгъа, бирликге байлавлу англатыв ишлени гючлендирме, оьсюп гелеген яш наслуну законгъа къаршы ишлерден къоруп сакълама чакъырды.

Чараны ахырында районну тамазаларыны Советини председатели Абдулгьамит Мамагишиев районну бары да халкъыны атындан Виктор Эппге, тыгъыс иш графигине де къарамайлы, районгъа иш сапар булан гелгени, районну далапчылары булан ёлукъма чола тапгъаны саялы, баракалла билдирди.