АТК гьисап берди

Шо гюнгю чараны районну башчысыны биринчи орунбасары Ибрагьим Абдулмежитов ачды ва юрютдю. Ол, залдагъылар булан саламлашып битген сонг, жыйынны гюнлюк ишин малим этди.

Ноябр айны 14-нде болгъан жыйында районну билим берив, маданият объектлерин, дин идараланы биналары терроргъа къаршы гьазирлиги арагъа салынып ойлашылды. Бу масъалагъа байлавлу районну АТК-ны вакили, районну ГО-ну ва ЧС-ни начальнигини орунбасары Магьач Гьюсенов гьисап берди. Ол жыйында сейлевюн давам эте туруп, районну территориясында билим ва тарбия беривню 90 объекти барны, шоланы 28-и орта билим береген школалар, бир школа-интернат, бир яшлагъа къошум билим береген центр, 34 школа чагъына етишмеген яшлар тарбияланагъан идаралар, 9 яшёрюмлени спорт школасы, 17 маданият объектлер.

Ол ­оьзюню сейлевюнде, районну билим берив управлениесини ёлбашчысыны янындан тийишли даражада тергев ёкъ саялы, буссагьатгъы вакътиге школагъа чагъы етишмеген яшлар тарбияланагъан 7 объект къоркъунчсузлукъну паспортларын алмагъанны аян этди.

Докладчыны сейлевюнден ­ачыкъ болгъаны йимик, школа чагъы етишмеген яшлар тарбияланагъан объектлеге къоркъунчсузлукъну паспортларын болдурма билим берив управлениесини къоркъунчсузлукъгъа къарайгъан бёлюгюню ёлбашчысы яда яшлар бавуну заведующийи гьайын этме герегин ачыкъ этди.

Магьач Гьюсенов жыйында сейлевюн узата туруп, районну ичиндеги бары да жума межитлер тийишли кагъызлары ёкъ саялы, къоркъунчсузлукъну паспортлары ёгъун да яшырмады.

Докладчыны сейлевюнден ачыкъ болгъаны йимик, районну 17 юртунда бар маданият объектлени 10-суну къоркъунчсузлукъну паспортлары ёгъун малим этди.

Сонг да докладчы жыйында АТК-ны этген ишин анализ этип сейлевюнде районну билим берив тармагъында къоркъунчсузлукъну болдурмакъ, террор ишлени алдын алмакъ учун бары да школаларда видиокамералар ясандырылгъанын, класлагъа яшланы дежурный муаллимлер гийирегенин, гечелер школаланы къаравулчулар сакълайгъанын, бары да школаларда ­от тюшювге къаршы билдиреген сигнализациялар барын, бары да школаларда къувунлу сигнализациялар салынгъанын ва ЕДДС-ге къошулгъанын малим этди.

М.Гьюсенов жыйында сёйлевюн тамамлай туруп, районну билим берив, маданият объектлеринде террорчулукъну алдын алывда йиберилген кемчиликлени алдын алмакъ учун оьрде токътагъан къурумлагъа билдиргенин де аян этди.